Памерла палітолаг Святлана Навумава
У яе адкрылася ўнутранае кровацячэнне, якое не ўдалося суняць у рэанімацыі.
Адышла з гэтага свету палітолаг Святлана Навумава. Пра гэта паведамілі «Нашай Ніве» яе вучні з Еўрапейскага гуманітарнага ўніверсітэта.
Яна доўгі час мужна змагалася са складанай хваробай нырак. Як стала вядома, у яе адкрылася ўнутранае кровацячэнне, якое не ўдалося суняць нават у рэанімацыі.
Яна трымалася незалежных поглядаў, брала ўдзел у развіцці незалежнага грамадства Беларусі. Апошні час яна працавала ў мазгавым цэнтры кампаніі «Гавары праўду». Яе не раз выклікалі на допыты, апошні ператрус быў у яе ў хаце 4 студзеня. Яна была адным з кіраўнікоў паліталагічнага кірунку ў ЕГУ.
У часе ператрусаў у «Гавары праўду» ў маі мінулага года ў яе, як і ў іншых, сканфіскавалі ўсе наяўныя ў хаце грошы. У яе выпадку то былі грошы для лекаў і гемадыялізу, на якіх яна сядзела. У адным з інтэрв’ю на сумна пажартавала, што можа і не дажывецца да вяртання іх. І нібы ў благі час сказала, бо і выйшла так, што не дажылася.
Было ёй 55 гадоў.
Вечная памяць.
* * *
Развітанне са Святланай Навумавай пройдзе 12 сакавіка з 13 да 15 у рытуальнай зале на Альшэўскага, 12.
Цяпер чытаюць
«На такую х**ню павялася». Расіянка прыехала з Сібіры ў Беларусь і цяпер з мацюкамі расказвае, як тут складана жыць4
Каментары