Ва Украіне завялі справу за перадачу Беларусі праграмы для вайсковых авіяцыйных трэнажораў
Ва Украіне распачалі крымінальную справу супраць грамадзяніна краіны, якога падазраюць у незаконнай перадачы Беларусі праграмнага забеспячэння для вайсковага авіяцыйнага трэнажора, піша «Радыё Свабода».
Паводле інфармацыі «Радыё Свабода», украінец, абыходзячы санкцыйныя абмежаванні і парушаючы правілы міжнароднай перадачы тавараў і тэхналогій падвойнага прызначэння, перадаў беларускім партнёрам праграму для стацыянарнага комплекснага трэнажора «КТС-21М». Гэты трэнажор выкарыстоўваецца для падрыхтоўкі пілотаў вайсковых самалётаў МіГ-29.
У справе могуць фігураваць некалькі грамадзян Украіны. Адзін з іх, паводле крыніцы, працуе ў Беларусі ў ЗАТ «Група вытворчых тэхналогій і авіяцыйнага машынабудавання «Аэрамаш», размешчаным у Мачулішчах пад Мінскам.
Прадпрыемства займаецца распрацоўкай, вытворчасцю, рамонтам і мадэрнізацыяй авіяцыйнай тэхнікі, а таксама стварэннем і абслугоўваннем авіяцыйных трэнажораў. На базе «КТС-21М» рыхтуюць пілотаў баявых самалётаў МіГ-29.
Украінскія следчыя лічаць, што перадача праграмнага забеспячэння адбылася не пазней за чэрвень 2025 года праз адзін з месенджараў. За перададзеную інфармацыю падазраваны, як мяркуецца, атрымаў 1000 даляраў.
Цяпер суд абмежаваў яго свабоду так званымі асабістымі абавязаннямі — мерай, падобнай да падпіскі аб нявыездзе.
Следства сцвярджае, што ўкраінец перадаў тэхналогію свайму былому калегу з Інстытута аўтаматызаваных сістэм Акадэміі навук Украіны. Раней падазраваны працаваў канструктарам электронных авіяцыйных трэнажораў. Ён удзельнічаў у распрацоўцы комплексаў для падрыхтоўкі экіпажаў вайсковых верталётаў Мі-8 і Мі-24, знішчальнікаў МіГ-29, а таксама транспартных самалётаў Іл-76.
Падчас ператрусаў у падазраванага канфіскавалі мабільныя тэлефоны і розныя электронныя носьбіты інфармацыі. Следчыя павінны высветліць, якія менавіта тэхналогіі былі перададзеныя Беларусі і хто яшчэ мог быць датычны да гэтай схемы.
Справа мае значэнне ў кантэксце вайсковага супрацоўніцтва Беларусі з Расіяй. Пасля пачатку поўнамаштабнага расійскага ўварвання ва Украіну беларускія ўлады дазволілі Расіі выкарыстоўваць беларускую вайсковую інфраструктуру і паветраную прастору. Акрамя таго, беларускія прадпрыемствы ўдзельнічаюць у выкананні расійскіх вайсковых заказаў.
«Белпол» апублікаваў расследаванне пра беларускіх шпіёнаў пад дыппрыкрыццём у Азіі, Афрыцы і Амерыцы. Хто яны? Поўны спіс
Яшчэ адзін суд у Кіеве адмовіўся разглядаць справу затрыманай па падазрэнні ў шпіянажы журналісткі Кардаш
Украіна можа абмяняць беларуску Кардаш на журналістаў, якія знаходзяцца ў расійскім палоне
У Расіі аб'явілі пра 23‑гадовы прысуд для «польскага шпіёна»
Цяпер чытаюць
«Кайлас, я іду». Што за беларуска знікла ў жудасным селі ў Непале9
Каментары