Стаўка рэфінансавання ў Беларусі павышаная з 10,5 да 12%

Стаўка рэфінансавання ў Беларусі 16 сакавіка павышаная на паўтара працэнтнага пункта, з 10,5% да 12%. Такое рашэнне прынята Нацыянальным банкам «у мэтах адэкватнага рэагавання на павышэнне ўзроўню інфляцыі, што назіралася ў пачатку года».

Як адзначаецца ў паведамленні ўпраўлення інфармацыі Нацбанка, індэкс спажывецкіх цэн у лютым 2011 года склаў 102,7%. Гэта галоўным чынам звязана з ростам тарыфаў на жыллёва-камунальныя паслугі з прычыны павелічэння цаны куплі прыроднага газу, які імпартуецца з Расійскай Федэрацыі, і ўздзеяннем павелічэння сусветных цэн на энерганосьбіты і прадукты харчавання.

«Павышэнне стаўкі рэфінансавання на 1,5 працэнтнага пункта звязана з неабходнасцю безумоўнага выканання ключавога прынцыпу працэнтнай палітыкі Нацыянальнага банка — падтрыманне ставак грашовага рынку на станоўчым узроўні ў рэальным выражэнні для надзейнай абароны рублёвых укладаў насельніцтва ў банках ад інфляцыі», — адзначае Нацбанк.

«На фоне няўхільнага выканання параметраў курсавой палітыкі, прадугледжаных асноўнымі кірункамі грашова-крэдытнай палітыкі Беларусі на 2011 год, такая мера прывядзе да далейшага ўзмацнення прывабнасці рублёвых зберажэнняў у параўнанні з укладамі ў замежнай валюце», — гаворыцца ў прэс-рэлізе.

Стаўка рэфінансавання з`яўляецца інструментам грашова-крэдытнага рэгулявання, пры дапамозе якога Нацыянальны банк уздзейнічае на стаўкі міжбанкаўскага рынку, а таксама стаўкі па дэпазітах юрыдычных і фізічных асоб і крэдытах, якія даюць ім крэдытныя арганізацыі.

У адпаведнасці з асноўнымі кірункамі грашова-крэдытнай палітыкі на 2011 год, прадугледжана зніжэнне стаўкі рэфінансавання да канца года да 8–10% гадавых.

15 верасня 2010 года стаўка рэфінансавання ў Беларусі была ўстаноўлена на ўзроўні 10,5%. З пачатку 2010 года гэты паказчык зніжаўся шэсць разоў (у лютым, красавіку, маі, ліпені, жніўні, верасні).

19 лютага віцэ-прэм`ер Сяргей Румас, выступаючы ў парламенце, заявіў, што ва ўрадзе не выключаюць магчымасці павелічэння сёлета стаўкі рэфінансавання. Нагадаўшы, што ў 2015 годзе ставіцца задача знізіць стаўку рэфінансавання да 6–8%, ён адзначыў: «Але тут сітуацыя будзе поўнасцю залежаць ад сітуацыі ў эканоміцы. Магчыма, сёлета з улікам інфляцыі стаўку рэфінансавання прыйдзецца павялічыць».

Паводле слоў Румаса, ён прыхільнік «таго, што льготныя працэнтныя стаўкі па крэдытах распускаюць і ні да чаго добрага не прыводзяць». У прыватнасці Румасу вядомыя выпадкі, калі рыначны крэдыт выкарыстоўваўся найлепшым чынам. «Але ёсць дзяржпрадпрыемствы, якія бяруць ільготныя крэдыты, асвойваюць іх, а пабудаваную вытворчасць нельга эфектыўна выкарыстоўваць», — дадаў віцэ-прэм`ер. Урад, падкрэсліў ён, «будзе абмяжоўваць бясплатную раздачу грошай».

• 0
• 0
• 0
• 0
• 0
• 0
• 0
• 0