«Выпісвалі мы яму шмат выданняў. Але ён нічога не атрымлівае».
24 мая зэкс-кандыдатам у прэзідэнты Андрэем Саннікавым, асуджаным на пяць гадоў калоніі ўзмоцненага рэжыму, у следчым ізалятары МУС № 1 на вуліцы Валадарскага ў Мінску сустрэлася яго маці Ала Саннікава.
Як паведаміла Ала Саннікава, яе сын «духам не падае». «Ён сказаў, што яму ў СІЗА МУС лепш, камера лепшая, праблем такіх, якія былі ў СІЗА КДБ, няма. Яго павінны былі перавесці ў следчы ізалятар у Жодзіне, але пакуль пакінулі ў Мінску. Ён бадзёры. Вельмі хвалюецца за сям’ю, за сваякоў, за мяне. Стан здароўя ў яго стабілізаваўся, як ён мне сказаў», — сказала Ала Саннікава.
Аднак, паводле яе слоў, сын не атрымлівае тых газет, якія яму былі выпісаныя. «Выпісвалі мы яму шмат выданняў. Але ён нічога не атрымлівае, як не атрымліваў і ў следчым ізалятары КДБ. Праўда, сказаў, што ў камеры ёсць тэлевізар, але гэта, напэўна, не тая інфармацыя, якую ён хацеў бы атрымліваць», — зазначыла маці
Паводле слоў маці, Андрэй Саннікаў ад разгляду касацыйнай скаргі на свой прыгавор «нічога добрага не чакае». «У гутарцы са мной ён пачаў рыхтаваць мяне да горшага. Ён казаў мне: «Ты ж бачыла, якая ў нас судовая сістэма. Будзь гатовая да ўсяго, не спадзявайся», — зазначыла Ала Саннікава.
14 мая ў судзе Партызанскага раёна Мінска кандыдат у прэзідэнты на выбарах 2010 года Андрэй Саннікаў быў асуджаны да пяці гадоў пазбаўлення волі з адбываннем пакарання ў калоніі ўзмоцненага рэжыму. Саннікаў прызнаны вінаватым на падставе часткі 1 артыкула 293 КК (арганізацыя масавых беспарадкаў), якая прадугледжвае пазбаўленне волі ад 5 да 15 гадоў.
24 мая стала вядома, што суддзя Наталля Чацвярткова, якая вынесла прыгавор Саннікаву, уключаная ў спіс неўязных у краіны Еўрасаюза.
Цяпер чытаюць
У турме памёр былы супрацоўнік КДБ Мікалай Варапай, асуджаны за шпіянаж на карысць Украіны3
Каментары