У Баранавічах распачалі крымінальную справу супраць «нудыстаў»
Узрост «нудыстаў» — ад 23 да 38 гадоў. Ім пагражае да 6 гадоў турмы.
Чатыром аматарам голага шпацыру па цэнтральных вуліцах пагражае да 6 гадоў турмы.
Чацвёра мужчын, якія пражываюць у Паўночным мікрараёне Баранавічаў, знаходзячыся ў стане алкагольнага ап’янення, днём 4 жніўня ў поўным негліжэ прайшліся ад Свяцілаўскага возера да Лядовага палаца. Іх адзенне неслі дзве жанчыны.
«Мінакі, якія сталі сведкамі гэтага “параду нудыстаў”, патэлефанавалі ў міліцыю, і парушальнікі парадку былі затрыманыя супрацоўнікамі дэпартамента аховы», — паведаміла прэс-сакратар Баранавіцкага ГАУС Наталля Сядзельнік. Паводле яе слоў, усе затрыманыя раней былі судзімыя, некаторыя —неаднаразова. Узрост «нудыстаў» — ад 23 да 38 гадоў.
«Спачатку мужчыны растлумачылі, што распрануліся, нібыта выконваючы ўмовы спрэчкі. Пазней сталі аднеквацца ад гэтага і спаслаліся на тое, што былі п’яныя і, нібыта, не памятаюць, што прымусіла іх выйсці на вуліцу без адзежы», — распавяла Наталля Сядзельнік.
У дачыненні да гараджан 10 жніўня Баранавіцкім ГАУС распачата крымінальная справа па ч. 2 арт. 339 КК РБ (хуліганства), згодна з якой ім можа пагражаць да 6 гадоў пазбаўлення волі.
Каментары