Аднапакаёвая кватэра ў першым у Мінску жылым хмарачосе каштуе 1 млрд рублёў
Здадуць «Ветразь» у сакавіку 2012-га - хоць павінны былі завяршыць працы яшчэ гэтым летам.
Працягваецца ўзвядзенне першага ў Мінску жылога хмарачоса «Ветразь». Забудоўшчык «Итерабелстрой» выпусціў актуальную праектную дэкларацыю аб стварэнні аб'екта долевага будаўніцтва. Згодна з дакументам, 1-пакаёвая кватэра ў хмарачосе будзе каштаваць крыху больш за мільярд рублёў.
Здадуць «Ветразь» у сакавіку 2012-га - хоць павінны былі завяршыць працы яшчэ гэтым летам.
У дэкларацыі, якую апублікавала «Звязда», прыводзяцца некаторыя характарыстыкі жылога дома. У ім будзе 2 секцыі па 32 паверхі, усяго - 204 кватэры.
Да праблемы размяшчэння аўтамабіляў падышлі наступным чынам: маецца падземны гараж-стаянка на 203 аўто і стаянка на 20 машына-месцаў у двары дома. Пад'езд да хмарачосу запраектаваны з вуліцы Ціміразева па тупіковым праездзе, які сканчаецца кальцавой разваротнай пляцоўкай. Уезд-выезд у гараж-стаянку арганізуюць з боку вул. Кальварыйскай і Ціміразева.
У сярэдзіне тэрыторыі жылога дома мяркуецца размяшчэнне двух дзіцячых пляцовак.
Кватэры (вышыня столяў у іх - тры метры) размешчаны на 5-30 паверхах. Яны маюць зашклёныя лоджыю або балкон. На 31, 32-м паверхах размесцяцца двухузроўневыя пентхаусы з адкрытымі тэрасамі на 31-м паверсе.
Усяго да продажу прапануецца 176 кватэр плошчай ад 60,77 кв. м да 179,68 кв. м.
Кошт - 18.409.640 рублёў за адзін «квадрат».Такім чынам, самая танная кватэра ў «Ветразі» абыйдзецца ўладальнікам больш, чым у мільярд рублёў. Параўнаць дынаміку коштаў, на жаль, не ўяўляецца магчымым. Раней на сайце заказчыка была размешчаная інфармацыя, паводле якой адзін «квадрат» у хмарачосе каштаваў ад 1650 да 2200 даляраў. Курс пераліку пры гэтым пазначаны не быў.
Забудоўшчык гатовы прадаць будучым жыхарам і месца ў аўтаматызаваным паркавальным модулі ў падземным гаражы па цане 298 млн рублёў. Усяго свабодна 194 месцы.
Цяпер чытаюць
Анжаліка Мельнікава пасля знікнення набыла дзве кватэры ў Мінску70
Каментары