«Можа, Корж мяне і не памятае». Нобелеўскі лаўрэат Алесь Бяляцкі расказаў, адкуль ведае Ваню Дзмітрыенку і Макса Каржа
Нобелеўскі лаўрэат Алесь Бяляцкі ў эфіры праграмы «Звычайны вечар» здзівіў слухачоў сваёй дасведчанасцю ў сучаснай папулярнай музыцы. Як высветлілася, праваабаронца не толькі разбіраецца ў трэндах расійскай эстрады, але і назіраў першыя крокі ў кар’еры беларускай зоркі — Макса Каржа.
Праваабаронца, лаўрэат Нобелеўскай прэміі міру Алесь Бяляцкі прыйшоў у госці ў праграму «Звычайны вечар».
Перад гэтым вядоўцы абмяркоўвалі, што цяпер слухае моладзь.
— Ну мы звычайна з нашымі гасцямі абмяркоўваем усе тэмы, якія былі ў эфіры, але мне неяк няёмка пытацца ў вас пра такое… Вось як я магу Алеся Бяляцкага запытаць пра Ваню Дзмітрыенку? — сказаў Канстанцін Каверын.
— Калі ласка! — адгукнуўся Бяляцкі.
Аказалася, што ён цалкам у тэме, бо, пакуль сядзеў, вывучыў усю гэтую расійскую сучасную культуру — наслухаўся ў калоніі.
— Як вы ўвогуле ставіцеся да гэтай моладзевай культуры? — спытаў Каверын.
— Ну, нармальна. Я сам у юнацтве ў школе з гітарай не расставаўся ў старэйшых класах. Іграў у гурце, калі ўжо ва ўніверсітэце вучыўся. Таму мне музыка заўсёды блізкая, — кажа ён і дадае, што музыку ў калоніі слухаюць лепш, чым беларускія навіны:
— Мы сапраўды глядзелі ўсю гэтую расійскую папсу, таму што фактычна атрад у лагеры быў падзелены на дзве групы: адны за музыку, другія за навіны.
Беларускія навіны там не любяць, кажа ён, ніхто іх не глядзіць, іх выключаюць.
— Там няма нічога істотнага. Як толькі пачынае крычаць Азаронак — пачынаюцца маты, яго хуценька пераключаюць. Глядзяць расійскія навіны і спрабуюць там паміж радкоў дастаць штосьці пра міжнародную сітуацыю, пра тое, што адбываецца ў Расіі, пра вайну з Украінай. Гэтыя тэмы спрабуюць выцягнуць з агульнай інфармацыі, адкідваючы ідэалогію.
Ну, а што датычыцца музыкі — хочаш не хочаш, ты яе слухаеш. Таму, натуральна, ведаю зараз гэтых зорак расійскай поп-музыкі, у тым ліку Дзмітрыенку. Ад яго ідзе пэўная энергія, ён хлопчык энергічны. Ён толькі пачынае, і як будзе развівацца далей — пабачым. Я разумею, чаму падлеткі ідуць на яго: гэта адно пакаленне, чалавек размаўляе з імі на адной мове, — сказаў Бяляцкі.
Гэта чапляе, у пэўным сэнсе, як і наш Макс Корж.
Аказалася, што Бяляцкі ведае даўно пра Каржа.
— Я, дарэчы, яго ведаю яшчэ студэнтам. Можа, ён мяне і не памятае, але быў такі перыяд, калі ён у маёй хаце здымаў свой беларускамоўны кліп, яшчэ на самым пачатку. Гэта было даўно. Я там проста быў збоку і калоў дровы. Яны двое сутак займаліся гэтым кліпам, калі ён спяваў яшчэ ў беларускамоўным гурце, — згадаў Бяляцкі.
Сам праваабаронца ў маладосці граў рок, але не стаў згадваць, пра што з сябрамі спяваў.
Каментары