Работнікі Гомельскага вагонарамонтнага завода патрабуюць павысіць заробак на 100%
Пад зваротам да адміністрацыі падпісаліся каля трыццаці чалавек.
Прыкладна 30 чалавек падпісаліся пад адозвай да адміністрацыі Гомельскага вагонарамонтнага завода з патрабаваннем павысіць зарплату, вырашыць праблемы з умовамі працы і ўкамплектаванасцю кадрамі.
Як паведаміў БелаПАН адзін з ініцыятараў збору подпісаў Дзмітрый Карашкоў, пад адозвай, якая была перададзена 3 лістапада, падпісаліся машыністы цеплавозаў, складальнікі цягнікоў транспартнага цэха завода, а таксама грузчыкі. У адозве выкладзена просьба ў тэрміновым парадку разгледзець пытанне
аб павышэнні з 1 лістапада зарплаты на 100% або прапарцыянальна афіцыйнай інфляцыі ў Беларусі.
«Мая апошняя зарплата — 1 млн. 200 тыс. рублёў. У астатніх прыкладна столькі ж. Нашы калегі з іншых структурных падраздзяленняў Беларускай чыгункі атрымліваюць у два разы больш, выконваючы тую ж працу. У нашых працоўных кантрактах сказана, што прадпрыемства абавязваецца выплачваць грашовае ўзнагароджанне не меншае за той узровень, які забяспечвае годнае існаванне. Зараз мы гэтага не бачым. Многія, паверыўшы нашаму прэзідэнту, які абяцаў стабільнасць і зарплату ў 500 долараў, узялі крэдыты, а расплачвацца ў цяперашніх умовах вельмі цяжка», — сказаў Карашкоў.
Паводле яго слоў, адміністрацыя пакуль не адрэагавала на адозву.
Гомельскі вагонарамонтны завод імя Калініна — прадпрыемства па рамонце пасажырскіх вагонаў. Таксама завод вырабляе матавозы, займаецца выпускам рознай металапрадукцыі.
Цяпер чытаюць
Зяленскі ў Вільні: Пакуль шпіц Лукашэнкі мае больш правоў, чым народ Беларусі19
Каментары