Шэсце ў Львове ў гадавіну Слуцкага паўстання — фота
У нядзелю ў Львове прадстаўнікі беларускай апазіцыі разам з львавянамі і мясцовымі палітыкамі адзначаюць беларускае нацыянальнае свята Дзень герояў.
Беларускія апазіцыянеры пачалі нядзельную раніцу малітвай за мінулых і сучасных герояў Беларусі ў львоўскім храме — за тых, хто загінуў 91 год таму і за 14 цяперашніх палітвязняў рэжыму, за тых людзей, якія адстойвалі і адстойваюць незалежнасць Беларусі.
«Усе палітвязні падвяргаюцца сур’ёзнаму ціску, мы за іх моцна перажываем. Перыядычна людзі знікаюць, і ні адвакаты, ні родныя не ведаюць, у якой турме яны знаходзяцца.Мы разлічваем на салідарнасць Украіны, спадзяемся, што той жах, які называецца лукашэнкаўскай дыктатурай, урэшце скончыцца», — каментуе сітуацыю старшыня Руху салідарнасці «Разам» і кіраўнік Беларускага цэнтру ва Украіне Вячаслаў Сіўчык.
Беларуская апазіцыя разам з львавянамі ўшанавала памяць удзельніка паўстання 1863–1864 гадоў Сымона Шыдлоўскага, які пахаваны ў Львове, а таксама правяла круглы стол, дзе гаварылася пра гістарычнае значэнне падзеяў 1920 года і пра сучасныя рэаліі Беларусі.
«Украінцам зразумелая гісторыя Беларусі і Дзень герояў. Аналагічныя падзеі адбываліся ў Халодным Яры. Тады Польшча з Савецкай Расіяй дзялілі і Беларусь, і Украіну. Беларуская і ўкраінская нацыі аказвалі супраціў», — кажа Вячаслаў Сіўчык.
Дзень герояў Беларусі завершыцца мітынгам ля помніка Тарасу Шаўчэнку і шэсцем да манумента правадыру АУН Сцяпану Бандэру.
Цяпер чытаюць
Мікола Статкевіч павіншаваў беларусаў з Днём Волі, запісаўшы першае ВІДЭА пасля вызвалення6
Каментары