У Белавежскую пушчу прыехалі з Паўночнага полюса Снягурка і Матухна Зіма
Амаль 1,5 тыс. чалавек прыехалі 3 снежня ў сядзібу беларускага Дзеда Мароза ў Белавежскай пушчы, дзе праходзіць сустрэча Снягуркі і Матухны Зімы.
У першыя выхадныя снежня яны традыцыйна вяртаюцца сюды з Паўночнага полюса і да вясны разам з Дзедам Марозам сустракаюць гасцей. У гонар іх прыезду галоўны навагодні персанаж штогод праводзіць свята.
Госці, якія прыехалі сёння ў сядзібу разам з Дзедам Марозам, Снягуркай і Матухнай Зімой, будуць вадзіць карагоды вакол ёлкі, удзельнічаць у розных конкурсах, змогуць пакатацца на навагоднім цягніку і ў запрэжанай коньмі калясцы.
У сядзібе адкрыта выстава работ майстроў народнай творчасці Камянецкага раёна Брэсцкай вобласці, праходзіць выступленне творчых калектываў рэгіёну.
Як паведамілі ў сядзібе, з гэтага дня ў рэзідэнцыі галоўнага беларускага Дзеда Мароза пачынаюцца пераднавагоднія святы, і традыцыйна ўзрастае колькасць гасцей. Найбольшая колькасць наведвальнікаў сядзібы, якая адкрыта круглы год, прыходзіцца на снежань і студзень.
Штогод колькасць наведнікаў Дзеда Мароза расце. У прыватнасці, за 11 месяцаў гэтага года ў яго пабывала 85 тыс. чалавек. За такі ж перыяд 2010 года — 74. тыс. чалавек.
Сядзіба беларускага Дзеда Мароза ў Белавежскай пушчы была адкрыта ў снежні 2003 года.
Каментары