Актывіст незалежнага прафсаюза Радыёэлектроннай прамысловасці Аляксей Паўлоўскі пачаў збіраць подпісы грамадзянаў, каб адклікаць вылучэнне Лідзіі Ярмошынай у кандыдаты сябра Цэнтральнай выбарчай камісіі.
Паводле Аляксея Паўлоўскага, спадарыня Ярмошына не можа працаваць у ЦВК, які зацвярджае вынікі галасавання на выбарах і рэферэндумах.
Аляксей Паўлоўскі заяўляе, што «масавы пратэст не дазволіць 21 снежня зацвердзіць Лідзію Ярмошыну ў склад ЦВК». Актывіст спадзяецца, што яго ініцыятыву падтрымаюць усе апазіцыйныя палітычныя партыі і рухі.
«У інтэрвію „Радыё Свабода“ Лідзія Ярмошына заявіла, што магілёўскі аблвыканкам і савет дэпутатаў вылучылі яе ў сябры Цэнтральнай выбарчай камісіі. Мы, падпісанты гэтага звароту, катэгарычна супраць гэтага вылучэння. Бо за час старшынявання ў ЦВК вынікі выбараў і рэферэндумаў фальшаваліся. Незалежнымі назіральнікамі фіксаваліся шматлікія парушэнні. Вынікі выбараў і рэферэндумаў не прызнаваліся цывілізаванымі краінамі. Праз гэта ў дачыненні да Беларусі выкарыстоўваюцца эканамічныя і іншыя санкцыі, а кіраўніцтва краіны патрапіла ў спіс „неўязных“. Цяпер у нас самая вялікая інфляцыя, дэвальвацыя рубля, зніжэнне ўзроўню жыцьця народу, недавер да ўлады і выбараў. Каб не паўтараць памылак, мы патрабуем адклікаць вылучэнне ад Магілёўшчыны ў ЦВК Ярмошынай. Гэта ўздыме аўтарытэт нашай краіны ў вачах цывілізаванага свету», — зазначае Аляксей Паўлоўскі.
Зварот Паўлоўскага з подпісамі тых хто падтрымлівае яго ініцыятыву адрасаваны афіцыйнаму кіраўніку Беларусі, Магілёўскаму аблвыканкаму і савету дэпутатаў.
Цяпер чытаюць
Тамара Віннікава прадала свой лонданскі дом, завешаны карцінамі самой сябе ШМАТ ФОТА20
Каментары