ЗША хочуць не забіваць ворагаў, а кіраваць імі

Уцечку апублікаваў сайт Public Intelligence, які і раней рассакрэчваў некаторыя дакументы ўрада ЗША што да пытанняў нацыянальнай бяспекі.

«Даведнік зброі несмяротнага дзеяння» змяшчае больш за сотню старонак, дзе падрабязна апісваюцца розныя віды, уключаючы лазеры, цеплавыя прамяні і гукавыя хвалі, якія можна выкарыстоўваць для самых розных мэт — ад разгону натоўпу да дэзарыентацыі варожай тэхнікі.

У дакуменце адлюстраваныя як прапановы па ўдасканаленні ўжо існых відаў, так і зусім новыя тэхналогіі, пра якія да гэтага часу пісалі толькі навуковыя фантасты.

Па словах экспертаў, на якіх спасылаецца BBC, спіс уяўляе сабой «камерцыйную мэту» амерыканскіх вайскоўцаў, якая запатрабуе працяглага фінансавання. Пры гэтым яго распрацоўнікам з’яўляецца Аб’яднанае ўпраўленне па несмяротнай зброі Пентагона, якое падвяргалася крытыцы ў мінулым за марнаванне грошай на так ніколі і не ажыццёўленыя праекты. Нягледзячы на тое, што Упраўленне пакуль не даказала сваю эфектыўнасць, амерыканскія вайскоўцы адчуваюць усё больш вострую патрэбу менавіта ў несмяротнай зброі.

У прыватнасці, у Іраку адной з самых вялікіх праблем было тое, што салдатам ЗША даводзілася ўжываць агнястрэльную зброю кожны раз, калі іракцы, прычым далёка не заўсёды баевікі, імкнуліся не спыняючыся праехаць на аўтамабілях кантрольна-прапускныя пункты. У шэрагу выпадкаў гінулі і атрымлівалі раненні цывільныя асобы.

У даведніку апісаныя як характарыстыкі кожнага віду несмяротнай зброі і яе стратэгічнае значэнне, так і магчымая шкода ад яе дзеяння. Так, найбольш тыповыя наступствы для чалавека, які трапіў у зону дзеяння, уключаюць часовую слепату, глухату і страту руху.

Вось адзін з прыкладаў: падводная імпульсная гармата, накіраваная супраць варожых аквалангістаў. Гукавая хваля ад яе ўздзейнічае на слых вадалаза, імгненна выклікаючы ў яго наймацнейшую млоснасць і цалкам яго дэзарыентуючы.

«Пабочны эфект» такой гарматы, якая, мяркуючы па дакуменце, знаходзіцца ў стадыі распрацоўкі, — магчымае негатыўнае ўздзеянне на падводную флору і фаўну.

Вось яшчэ некаторыя апісаныя ў дакуменце распрацоўкі:

— сістэма, у зоне дзеяння якой у людзей з’яўляецца адчуванне невыноснай спёкі, за кошт чаго яны міжвольна перамяшчаюцца ў іншыя месцы;

— уздзеянне на мускульную сістэму чалавека электрычнымі імпульсамі;

— партатыўная сістэма, што выпускае магутныя мікрахвалі, здольныя на адлегласці спыніць аўтамабілі і іншую тэхніку;

— беспілотнік, абсталяваны мікрахвалевай прыладай, здольнай выклікаць збоі ў электрычнай сістэме марскіх судоў.

У Пентагоне не пацвярджаюць, але і не адмаўляюць сапраўднасць дакумента.

Зрэшты, у Пентагоне лазеры выкарыстоўваюць не толькі для несмяротнай зброі: яны ўжо паказалі, што цалкам здольныя знішчаць мэты. Эксперыменты па баявым выкарыстанні лазераў вядуцца амерыканцамі з 1970-х.

Што да небаявога выкарыстання лазераў і мікрахваляў, то «мікрахвалевыя гарматы» яшчэ ў 2010 годзе пачалі выпрабоўваць на зняволеных у турмах — як сродак падаўлення бунтаў.

• 0
• 0
• 0
• 0
• 0
• 0
• 0
• 0