Брэсцкія сацыял-дэмакраты пачынаюць падрыхтоўку да парламенцкіх выбараў

Брэсцкая абласная арганізацыя Беларускай сацыял-дэмакратычнай партыі (Грамада) пачынае падрыхтоўку да парламенцкіх выбараў 2012 года.

Пытанне ўдзелу ў кампаніі абмяркоўвалася 4 сакавіка ў Брэсце на абласной справаздачна-выбарнай канферэнцыі сацыял-дэмакратаў, дзе былі падведзены вынікі працы партыйнай структуры за 2010–2011 гады і абрана яе кіраўніцтва. Старшынёй абласной арганізацыі зноў стаў Ігар Маслоўскі.

«На канферэнцыі прынята рашэнне сфарміраваць спіс актывістаў, куды ўвойдуць патэнцыяльныя кандыдаты ў дэпутаты Палаты прадстаўнікоў і члены іх каманды. Таксама мы дамовіліся аб вылучэнні партыйцаў у склады выбаркамаў і назіральнікамі, — паведаміў БелаПАН Маслоўскі. — Канчаткова фармат нашага ўдзелу ў гэтай выбарчай кампаніі будзе прыняты бліжэй да выбараў з улікам палітычнай сітуацыі ў краіне і наяўнасці да таго часу палітзняволеных».

4 сакавіка ў Брэсце адбылася гарадская справаздачна-выбарная канферэнцыя БСДП (Грамада). Старшынёй структуры сацыял-дэмакратаў пераабрана Ганна Канюс.

«На абедзвюх канферэнцыях былі распрацаваны прыярытэтныя кірункі дзейнасці арганізацый на бліжэйшыя два гады. У іх ліку — вызваленне палітзняволеных, змяненне выбарчага заканадаўства ў Беларусі, абарона сацыяльна-эканамічных правоў жыхароў рэгіёну, правядзенне кампаній і акцый па вырашэнні рэгіянальных праблем», — сказаў Маслоўскі.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ