Кампанія «Гавары праўду!» пачынае рэалізацыю праекта «Будкантроль», мэта якога заключаецца ў арганізацыі грамадскага кантролю над будаўнічымі работамі ў сталіцы. Пра гэта было аб’яўлена 7 сакавіка напрэс-канферэнцыі ў Мінску.
«Адны змагаюцца за помнікі, другія — за экалогію, трэція — за якасць будаўніцтва. У выніку ў нас няма адзінага сістэмнага падыходу да праблемы, якая называецца — будаўніцтва ў Беларусі», — заявіў намеснік старшыні «Гавары праўду!» Андрэй Дзмітрыеў.
На пытанне, ці не дастаткова існых кантрольных службаў, якіх у нашай краіне і без таго лішак, ён адказаў: «У нас хапае кантролю ўсялякага, але робіцца ўсё, каб не было галоўнага кантролю — грамадскасці, грамадзян над уладай. Вось гэтага мы і дамагаемся ва ўсіх кірунках, дзе зараз дзейнічае кампанія «Гавары праўду!», — прывядзення сітуацыі да празрыстай Беларусі, Беларусі для грамадзян, дзе мы кантралюем крокі ўладаў. Там, дзе чыноўнікі зарабляюць, дзе спрабуюць атрымаць хабар, выкрасці — там павінны быць мы, грамадзяне і прадстаўнікі «Гавары праўду!».
Паводле слоў Дзмітрыева, сярод экспертаў праекта — юрысты, спецыялісты ў сферы дзяржаўнага будаўніцтва. «Мы прапануем змяніць сістэму ўнутры дзяржапарату, — тлумачыць ён, — узаконіць правы грамадзян на грамадскія слуханні як элемент прыняцця рашэнняў, а не іх наступнай фармальнай легітымізацыі. Будзем прыцягваць эканамістаў, які дапамогуць пралічыць праект, каб паказаць, што ён проста неэфектыўны ў тым ці іншым месцы».
