Дакументальны фільм «Даволі! Да Волі…» беларускіх рэжысёраў Вячаслава Ракіцкага і Андрэя Куцілы заваяваў галоўны прыз у намінацыі «найлепшы дакументальны фільм» на Еўрапейскім кінафестывалі ў горадзе Опузэн (Харватыя).
Галоўная мэта гэтага фестывалю, які сёлета праводзіўся другі раз у курортным горадзе на беразе Адрыятычнага мора, — спрыяць развіццю новых кірункаў у еўрапейскім кінематографе. Гэтым разам на фестывалі было паказана 70 фільмаў, якія цягам сямі дзён, з 18 да 25 жніўня, паглядзелі каля 12 тысяч чалавек.
Фільм «Даволі! Да Волі…» незалежныя беларускія рэжысёры зьнялі на замову тэлеканала Белсат да першай гадавіны падзеяў у Мінску 19 снежня 2010 года. У ім распавядаецца пра лёсы людзей, якім надакучыла жыць у хлусні і якія выйшлі на мірную акцыю пратэсту супраць несправядлівых прэзідэнцкіх выбараў, за што былі кінутыя ў турмы, перанеслі маральныя і фізычныя катаванні, страцілі вучобу і працу.
Каментары