Паштовая скрынка
Андрэю Б. з Гомеля. Вось шэраг адрасоў, якія могуць быць Вам карысныя:
— Каардынацыйны камітэт беларусаў Канады:
Belarusian Canadian Coordinating Committee
54 Mary Street, Barrie, Ontario L4N 1T1, CANADA
— Апостальскі візытатар для беларусаў-каталікоў усходняга абраду:
Apostolic Visitor for Belarusians, Marian House.
Holden Ave. London N12 8HY, ENGLAND
— газэта «Беларус»: 204 Ave. N. Brooklyn, NY 11230, USA
Што да Рады БНР, дык ці досыць важнае пытаньне, каб турбаваць?
Вельмі зручна таксама зьвязвацца праз электронную пошту — хутка і танна, або нават бясплатна, калі ў Вас ёсьць такая магчымасьць. Пытайцеся ў людзей іх электронныя адрасы.
Марку Р. з Асіповічаў. Чакаем ад Вас прозы і фэльетонаў. Дарэчы, на Вашым лісьце штэмпэль: СССР Могилев ОПП.
Канстанціну К. зь Віцебску. Чамусьці ствараецца ўражаньне, што ўсе гэтыя сьмяшынкі - «пстрычкі» — з барадой.
Марыі Л. зь Вялейкі. Для нас было б цікава надрукаваць такое прыватнае ліставаньне, але ўнутраная сьпіраль эпісталярнага жанру раскручваецца толькі тады, калі друкуюцца ня два лісты, а чатыры, пяць, больш.
Кастусю Т. зь Менску. Наш час людзей прывучыў няспынна шукаць найноўшага, сьвежага, раней невядомага. Ды гэта й прыродны абарончы рэфлекс наш беларускі (народу, які калянізатары заўсёды імкнуліся прытрымаць ззаду, у архаіцы, у мінуўшчыне) — вельмі войстра старацца трымацца на хвалі сучаснасьці. Вы нам прыслалі маралізацыю Міколы Гогаля, а нам, па шчырасьці, і брацца чытаць іх ня хочацца — бо гэта старадаўняе, бо невядомае, бо з расейскай мовы перакладзенае. І на якую старонку газэты такое паставіць? У «Шуфляду» — маралісты ўкрыўдуюць, у «Словы» — слабаватае яно як для літаратуры, дарма што Гогалева. Хіба што падрыхтаваць нумар пра «даўнія й сучасныя этыкі й маралі». Бо ж мы маем толькі 16 старонак — і яшчэ менш рубрык.
Уладзімеру А. з Баранавічаў. Заняткі Беларускага Калегіюму па дыстанцыйнай сыстэме навучаньня для несталічных жыхароў маюць распачацца на пачатку наступнага году. Тэл. для даведак: 256-36-13
Цяпер чытаюць
81‑гадовую маці аўтарытэта Скітова з «Бабулінай крынкі» кінулі ў СІЗА КДБ, каб ён нарэшце загаварыў6
Каментары