Лісты ў рэдакцыю
Пастка для грамадзянскай супольнасьці
Увесь год грамадзяне, аб’яднаныя ў прафсаюзы, грамадзкія арганізацыі, даказваюць, што яны існуюць — што ў сапраўднасьці аб’яднаныя ў арганізацыі, што колькасьць сяброў у пярвічных структурах гэтых арганізацыяў адпавядае патрабаваньням дэкрэту №2. Калі ж кіраўнікі грамадзкіх арганізацыяў ня выканаюць усіх патрабаваньняў, то іх грамадзкая дзейнасьць будзе па-за межамі закону. Працэсам перарэгістрацыі кіруе спэцкамісія на чале з У.Замяталіным, і рашэньні камісіі не падлягаюць абскарджваньню ні ў якой судовай інстанцыі. Спэцкамісія проста выдае рэкамэндацыі для Мінюсту. Менавіта яна вырашае, адмовіць у рэгістрацыі ці не адмаўляць.
Але адмова ў рэгістрацыі падасца дробязьзю ў параўнаньні з тым, калі «генэралы» грамадзкіх арганізацыяў застануцца без «салдатаў» — нізавых структураў. Менавіта на гэта накіравана бюракратычная машына: паставіць базавыя структуры на мяжу закрыцьця. Дзеля гэтага падрыхтавана пастка пад назвай «юрыдычны адрас», безь якога рэгіянальную структуру не паставяць на ўлік ва ўпраўленьні юстыцыі і ў райвыканкаме. Да дэкрэту было па-эўрапейску проста: чалец арганізацыі прадстаўляў сваю хату пад юрадрас, зьвяраючы свой подпіс ва ўладальніка жыльля, — і праблема здымалася. Але цяпер, у адпаведнасьці з Жыльлёвым кодэксам, уведзеным з 1 ліпеня (вось дзе расстаўлена пастка), уладальнікі жыльля ня маюць права гэта зрабіць — глядзіце арт. 8 ЖК.
Цяпер кожны кіраўнік павінен знайсьці ўстанову, якая мае памяшканьне, гатовая прадставіць яго для сходаў і іншай статутнай дзейнасьці арганізацыі, а таксама пад юрыдычны адрас.
Калі праблема з юрадрасамі ня будзе зьнятая, то адназначна гэта будзе выкарыстана пад час выбарчых кампаніяў, калі партструктуры, што ня сталі на ўлік, ня змогуць удзельнічаць у выбарах: вылучаць прадстаўнікоў у камісіі, мець кандыдатаў, назіраць за выбарамі.
Гэтая праблема будзе й надалей актуальнаю для грамадзянскай супольнасьці. Шкада, што яе раней не адчулі кіраўнікі НДА і апазыцыі, бо менавіта ўвесь спэктар праблемаў перарэгістрацыі грамадзкіх арганізацыяў павінен быць першачарговы на кансультацыях з уладамі. Галоўнае зараз: ці не застанецца ў канцы году на кансультацыях з Лукашэнкам наша апазыцыйная генэральская дэлегацыя штабам бяз войска? Ва ўлады зараз ёсьць усе «юрыдычныя» магчымасьці зрабіць менавіта так.
Міхась Лагор, Гарадок
Цяпер чытаюць
«Узнікаюць уяўленні, што палітвязні мусяць быць стойкімі, сабранымі, удзячнымі. А рэальнасць розная». Пагаварылі з людзьмі, якія водзяць дэпартаваных літаральна за руку66
Каментары