Новыя кнігі, дасланыя ў рэдакцыю
Навінка “Кнігазбору”
Кніга выбраных працаў Яўхіма Карскага «Беларусы» выйшла ў выдавецтве «Беларускі кнігазбор». «Беларусы» Я.Карскага — 16-ы выпуск гэтае выдавецкае сэрыі. Гэтак жа звалася й 3-томнае (у 7-мі кнігах) найбольш поўнае выданьне працаў Я.Карскага з досьледам і апісаньнем побыту, традыцыяў, мовы й літаратуры нашых продкаў, выдадзенае на пачатку ХХ ст. (перавыдадзенае па апошняй вайне ў Маскве). У кнігазбораўскае выданьне выбраных твораў увайшоў цалкам 1-ы том, пасьляслоўе з 2-га й разьдзел «Народная паэзія» з 3-га тому «Беларусаў». Тэксты надрукаваныя моваю арыгіналу — расейскаю, пры гэтым дзяржава не дала ні капейкі на выданьне твораў першага беларуса-акадэміка Расейскае Імпэратарскае Акадэміі Навук, рэктара Варшаўскага ўнівэрсытэту, заснавальніка беларускага мовазнаўства. Працы ж, што ўвайшлі ў новае выданьне, — усяго толькі часьцінка творчае спадчыны Я.Карскага, што налічвае больш за тысячу дасьледаваньняў, артыкулаў і рэцэнзіяў.
Постаць навукоўца даволі супярэчлівая. Сваёю навуковаю дзейнасьцю Я.Карскі давёў, што беларусы — самастойны народ, стварыў грунт беларускага адраджэньня пачатку ХХ ст. Пры ўсім гэтым ён глядзеў на Беларусь як на неадлучную частку Расеі. Беларус з паходжаньня, Я.Карскі быў не беларускім адраджэнцам, а звычайным расейскім навукоўцам з традыцыйнымі поглядамі расейца на Беларусь.
В. М.
Каментары