За часы знаходжаньня ля ўлады Аляксандра Лукашэнкі апазыцыйныя сілы неаднаразова намагаліся аб'яднаць свае высілкі ў барацьбе за ўладу. Летам 1996 г. сем апазыцыйных партый зьбіраюцца на "круглы стол" для каардынацыі дзейнасьці.
У кастрычніку 1996-га быў праведзены нацыянальны кангрэс "У абарону дэмакратыі, супраць дыктатуры". Аднак поўнага адзінства дзеяньняў не было з прычыны адсутнасьці адзінага цэнтру кіраваньня. На такую ролю прэтэндаваў Вярхоўны Савет, тады як найбольшую папулярнасьць сярод палітычна актыўных выбарцаў меў БНФ, у ВС не прадстаўлены. У выніку ўнутрыкааліцыйная дысцыпліна так і не ўсталявалася.
У 1999 г. паўстае Кансультацыйная рада апазыцыйных палітычных партыяў (АГП, БНФ, БСДП(НГ), БСДГ, БПП, Партыя жанчын "Надзея", ПКБ). Кароткі час у склад Рады ўваходзілі ЛДП і "беларускі" "Яблык" Абрамавай. Структура паўстала з ініцыятывы АБСЭ і аб'яднала і жука і жабу і рака з кляшнёю. Будучыні ня мела.
31 жніўня было абвешчана пра аб'яднаньне маладых палітыкаў "новай хвалі" "для правядзеньня восеньскага наступу на дыктатуру". У групу ўвайшлі Зьміцер Бандарэнка, Алесь Бяляцкі, Вінцук Вячорка, Аляксандар Дабравольскі, Павал Данэйка, Віктар Івашкевіч, Анатоль Лябедзька, Мікола Статкевіч. Іх намаганьнямі 17 кастрычніка быў праведзены першы "Марш Свабоды", а ў сакавіку 2000-га - другі. Ініцыятыва не прадугледжвала фармальнага аб'яднаньня і ўнутрыкааліцыйнага цэнтралізму. У студзені стварылася Каардынацыйная рада дэмакратычных сілаў (КРДС), у якую ўвайшлі АГП, БНФ, БСДП (НГ), БСДГ, БПП, Партыя жанчын "Надзея", экалягічная партыя "БЭЗ", Асамблея няўрадавых арганізацыяў, "Хартыя'97" і Кангрэс дэмакратычных прафсаюзаў. Задачай КРДС было аб'яднаньне апазыцыі для ўдзелу ў будучых парлямэнцкіх і прэзыдэнцкіх выбарах. Аднак, кааліцыя ня мела прывабнае назвы і ўнутранае дысцыпліны. Таму ў 2001 г.
КРДС нават не ўдалося вылучыць свайго кандыдата ў прэзыдэнты. А БСДП (НГ), ПКБ і БПП у ліпені 2001-га ўтварылі левацэнтрысцкую канфэдэрацыю "За сацыяльныя перамены" як процівагу КРДС, якую яны лічылі "правацэнтрысцкай".
Кандыдата ж вылучыла г.зв. "пяцёрка" кандыдатаў у прэзыдэнты, утвораная ў траўні 2001-га. Яна яднала пераважна "адзінокіх палітыкаў" і была моцна залежная ад парадаў сваіх замежных спонсараў. Параза на выбарах вырашыла яе лёс.
Цяпер чытаюць
Загнуўся бізнэс члена хакейнай каманды Лукашэнкі, які абяцаў пабудаваць лыжны манеж за Вярхоўным судом узамен на ласыя ўчасткі3
Каментары