Хроніка

11 жніўня Берасьцейскі аблсуд адмяніў папярэджаньне, вынесенае райсудом дэпутату Маларыцкага райсавету (БНФ) Уладзімеру Малею «за арганізацыю несанкцыяванага сходу», бо справа разглядался пры адсутнасьці адказьніка. Адміністрацыйная справа накіраваная ў той самы суд на паўторны разгляд. Старшыню Гомельскай абласной філіі АГП Уладзімера Кацору 12 жніўня затрымалі на пасту аўтаінспэкцыі ў Жлобіне, абвінаваціўшы ў крадзяжы аўтамабіля, ды ўсяго толькі сканфіскавалі некалькі тысяч асобнікаў газэты «Время» ды ўлёткі «5+». 13 жніўня скаргу ў пракуратуру на дзеяньні міліцыянтаў, якія затрымалі яго 21 ліпеня, падаў актывіст «Зубра» Сяргей Кунец. 13 жніўня выбарчыя камісіі не зарэгістравалі ініцыятыўных груп Валер’я Шчукіна, Вольгі Карач і Аляксея Гаўруцікава ў Віцебску (апошні — з Народнай Грамады), Леаніда Мархоткі ў Салігорску, Сьвятланы Каралёвай (АГП), Зьмітра Дашкевіча (Малады Фронт, Менск). З 19 чальцоў ініцыятыўнай групы Аляксандра Галакціёнава (Амсьціслаў, АГП) да 16 жніўня пад ціскам уладаў 10 чалавек вырашылі выйсьці. В.Леванеўскаму падоўжылі тэрмін утрыманьня пад вартай да 13 верасьня. Актывіст «Зубра» Аляксей Шыдлоўскі 16 жніўня быў аштрафаваны на 95 тыс. руб. за распаўсюджваньне ўлётак. Дэпутат Менскага райсавету, намесьнік старшыні ПБНФ Юрась Зянковіч 17 жніўня выкліканы ў суд, дзе яго маюць судзіць за «непадпарадкаваньне патрабаваньням работнікаў міліцыі»: яго затрымалі 21 ліпеня пасьля канцэрту на плошчы Бангалор. Уладзімеру Мацюшэнку зь Лепелю 17 жніўня заявілі ў выканкаме: «Вас цяпер нідзе на працу ня возьмуць» — за ўдзел у ініцыятыўнай групе кандыдата Алега Тычыны. 17 жніўня суд Першамайскага раёну Менску не задаволіў пазову Анатоля Лябедзькі да НДТРК, АНТ і СТВ: лідэр АГП адстойваў свой гонар, зьняважаны фільмам «Дарога ў нікуды». Лідзія Ярмошына на паседжаньні 17 жніўня назвала Сержука Салаша «базарным мужыком» і прапанавала адкрыць на яго крымінальную справу за паклёп на выбарчую камісію. 12 жніўня В.Леванеўскі абвясьціў галадоўку: ён патрабуе прыёму скаргаў у вышэйшыя інстанцыі, сустрэчы з судзьдзём і зь дзецьмі, азнаямленьня з матэрыяламі справы. Ю.Зянковіча 17 жніўня аштрафавалі на 5 б.в. 18 жніўня ў пракуратуру Воранаўскага раёну паступіла скарга на старшыню Гіркаўскага сельсавету Марыю Кулік, якая агітуе жыхароў не падпісвацца за вылучэньне Аляксандра Мілінкевіча. Пракурор Маларыцкага раёну 18 жніўня вынес касацыйны пратэст на рашэньне раённага суду, які задаволіў пазоў ПБНФ да начальніка аддзелу па ідэалягічнай працы Маларыцкага райвыканкаму Сяргея Строка.

АШ

• 0
• 0
• 0
• 0
• 0
• 0
• 0
• 0