Беларусь апынулася на вастрыі геапалітычнае барацьбы. Аб гэтым сьведчаць падзеі апошніх тыдняў у Камісіі ААН па правах чалавека ў Жэнэве. Спэцдаклад па Беларусі ёсьць. А ці будуць спэцдакладчыкі ААН?
У цэнтры ўвагі Камісіі ААН па правах чалавека апынулася рэзалюцыя пра беларускую сытуацыю за 15 красавіка мінулага году. Сёлета да 20 красавіка камісія павінна вярнуцца да разгляду гэтага пытаньня па выніках спэцдакладу Адрыяна Севярына аб правах чалавека ў Беларусі. Ня выключана, што рэзалюцыя будзе зьнята з абмеркаваньня, а сам інстытут спэцдакладчыкаў скасаваны.
Сам па сабе Севярынаў даклад ня выклікаў сэнсацыі ні ў міжнароднай супольнасьці, ні, тым больш, у самой Беларусі. Факты парушэньня правоў чалавека ў краіне абнародаваліся неаднойчы, пагаршэньне сытуацыі апошнім часам нязьменна адзначаецца самымі рознымі міжнароднымі арганізацыямі. Ня стаў нечаканым і адказ афіцыйнага Менску на крытыку: кіраўнік беларускай дэлегацыі Сяргей Алейнік патрабаваў ад Севярына прабачэньняў перад беларускім народам за абразу. Спэцдакладчык, у сваю чаргу, абвінаваціў Менск у крывадушнасьці.
Спрактыкаваны дыплямат А.Севярын апынуўся пад скрыжаваным агнём — яго атакавалі ня толькі беларускія чыноўнікі, але й Ірына Красоўская, на думку якой даклад вызначаўся празьмернай мяккасьцю. Сытуацыя, аднак, выявілася значна вастрэйшаю, чым уяўлялася беларускім праваабаронцам. Значная частка краін поруч зь Беларусьсю дамагаецца замацаваньня такога мэханізму прыняцьця рашэньняў, які б дазволіў увогуле здымаць з разгляду пытаньні па правах чалавека ў канкрэтных краінах і, як вынік, ліквідаваць у будучыні сам інстытут спэцдакладчыкаў. Расеі, напрыклад, ужо ўдалося наладзіць падрыхтоўчую працу ў кулюарах такім чынам, што рэзалюцыя па сытуацыі ў Чачэніі, напрыклад, на 61-й сэсіі камісіі ААН разглядацца ня будзе!
Поўны варыянт артыкулу чытайце ў папяровай і pdf-вэрсіі газэты "Наша Ніва"
Жэнэва
Каментары