У Курапатах ізноў усталявалі шыльду ў памяць аб рэпрэсаваных афіцэрах — фоты

У Курапатах устанавілі памятную шыльду ў гонар афіцэраў, якія былі расстраляныя падчас так званай «польскай аперацыі».

У ходзе гэтай аперацыі НКВД у красавіку-чэрвені 1940 года было расстраляна каля 22 тысяч афіцэраў польскай арміі. Прычым розных нацыянальнасцяў: там былі і палякі, і беларусы, і ўкраінцы. Аперацыя праводзілася ў Катыні, пад Харкавам і пад Медным.

Па папярэдніх падліках, там было расстраляна каля 3600 афіцэраў-беларусаў, то бок ураджэнцаў Заходняй Беларусі катавалі і па-за межамі гістарычнай радзімы.

«Іх прах знаходзіцца ў розных месцах, сёння мы хацелі б ушанаваць памяць тых, у каго няма ні магілы, ні імёнаў, тых, хто праз 70 гадоў пасля гэтага выпадку не былі рэабілітаваныя. Можна спрачацца, дзе гэта было, можна спрачацца наконт персаналіяў, але адмаўляць гэты факт савецкага мінулага нельга».

Ігар Кузняцоў прагназуе, што шыльда правісіць да раніцы, у лепшым выпадку — некалькі дзён.

«Чаму гэты знак усталяваны на дрэве? Таму што пакуль у загадзе яшчэ не прапісана, што тэкст мемарыяльнай таблічкі павінны быць зацверджаны ў Акадэміі навук.

Я адзіны дыпламаваны спецыяліст па праблеме рэпрэсій і зараз я ўзяў на сябе навучную і грамадзянскую адказнасць за тое, што напісаў.

Падчас адкрыцця шыльды па ўрочышчы шпацыравалі некалькі чалавек. «Гэта людзі КХП-БНФ прыйшлі назіраць за акцыяй, якая тут праводзіцца сёння з наступным дакладам Зянону Пазняку! — перакананы Кузняцоў. Асоба Пазняка не дае яму спакою: «Напэўна, зручна адкуль-небудзь з Нью-Ёрка ці Варшавы казаць, што гэты правакатар. гэты — гэбіст… Прыедзь сюды, і тут падыскутуем, хто гэбіст, а хто не».

Гісторык прапануе працягнуць даследаваць архівы, бо ёсць рэальная магчымасць пачынаць праверку пайменна. Зараз у гэтым спісе 15–20% тых, каго не расстралялі, а выслалі ў Варкуту ці яшчэ кудысьці.

Устаноўка першай памятнай шыльды па польскіх афіцэрах выклікала пратэсты сяброў Народнага Фронту, якія аддаўна займаюцца Курапатамі. На думку Зянона Пазняка, такія надпісы скажаюць гістарычную праўду: у Курапатах пахаваныя найбольш беларусы і грамадзяне Беларусі розных нацыянальнасцяў.

• 0
• 0
• 0
• 0
• 0