Цяпер Чыж жыве аточаны недабразычліўцамі і не падтрымлівае кантактаў не толькі з колішнімі сябрамі, але нават з некаторымі кроўнымі сваякамі.
Юрый Чыж — апальны бізнэсмен, некалі блізкі да ўлады, які стаў ахвярай інтрыг іншых царадворцаў.
Яго затрымлівалі ў сакавіку па вяртанні з Масквы.
Юрый Чыж, фота Сяргея Гудзіліна
Разам з Чыжом былі затрыманыя кіраўнікі некалькіх кампаній, якія засталіся ў бізнэсмена пасля разгрому яго імперыі.
Прэтэнзіі ў сілавікоў узніклі да топ-менеджменту «Кварцкрэйдапрама» — прадпрыемства ў Маларыцкім раёне, якое забяспечвала крэйдай бярозаўскі завод па вырабе будматэрыялаў (таксама належыць Чыжу). Таксама нібыта затрыманы хтосьці з кіраўнікоў «Данпрада» — прадпрыемства на Валожыншчыне, якое вырабляла свініну.
Нарэшце, прыйшлі і ў «НафтаХімТрэйдынг» — адзін з апошніх бізнэсаў Чыжа, які паспяхова працягваў працаваць. У сеткі з 11 заправак, тры з якіх знаходзяцца ў Мінску, чатыры месяцы таму забралі ліцэнзію на продаж паліва.
Як вядома «Нашай Ніве», сэнс справы перагукваецца з ранейшай крымінальнай справай супраць Чыжа ў 2016-м — калі яго затрымлівалі па падазрэнні ва ўхіленні ад сплаты падаткаў і збораў у асабліва буйным памеры.
Тады справа да суда не дайшла, бо Чыж прызнаў віну і кампенсаваў шкоду. Але як можна меркаваць, рахунак яму выставілі немалы і расцягнуты ў часе. Станам на 2021 год ён нібыта заставаўся вінны і дзяржаве, і бізнэс-партнёрам, якія спаганялі з Чыжа даўгі праз суд.
Але Чыж па абавязацельствах нібыта не плаціў, хаця асобныя яшчэ «жывыя» яго бізнэсы прыносілі грошы.
Дапоўнена:
Пасля публікацыі навіны пра Чыжа з Рэдакцыяй звязаліся юрысты «Ракаўскага бровара» і «Трайпла».
«Мы не даём ніякіх каментароў з нагоды затрымання Юрыя Аляксандравіча. Адзінае, што можам сказаць, — на гэты момант ён пад хатні арышт не адпушчаны», — пераконваюць яны.
