«Віталюр» рызыкуе паўтарыць лёс «Домашнего»? Пастаўшчыкі падаюць на кампанію ў суд
Як стала вядома «Нашай Ніве», трывожная сітуацыя складваецца вакол яшчэ адной вядомай сеткі рытэйла — «Віталюр», якой кіруе бізнэсмен Аляксандр Яцук.
Пастаўшчыкі кажуць, што «Віталюр» з імі не разлічваецца: вядома пра доўг у 444 тысячы рублёў перад пастаўшчыком круп «Экалайнгрупп», пра доўг у 159 тысяч перад «Малочным мірам — сталіца». Інфармацыю пра гэта публікуе суд.
Як вынікае з балансавай справаздачнасці кампаніі, 2020 год ёй даўся цяжка. Чыстыя страты «Віталюра» — больш за 25 мільёнаў рублёў. І гэта на фоне чыстага прыбытку каля 13 мільёнаў у 2019-м. Таксама за мінулы год удвая, да 139 мільёнаў, выраслі абавязацельствы кампаніі па пагашэнні «кароткатэрміновых» (з тэрмінам пагашэння да 12 месяцаў) крэдытаў і займаў.
Аляксандр Яцук не стаў гаварыць з карэспандэнтам «Нашай Нівы». Але як тлумачаць «Нашай Ніве» абазнаныя крыніцы, праблема ў тым, што кампанія актыўна будавалася, але ў 2020-м прыйшоў крызіс.
Банкі скарацілі магчымасці фінансаваць будоўлю. Давялося даставаць грошы, якія павінны былі пайсці на разлік з пастаўшчыкамі.
Цяпер кампанія спрабуе перакрэдытавацца ці прадаць частку будынкаў, але цану нерухомасці ў бізнэс-колах пакуль называюць «завышанай», пакупнікоў у сённяшняй сітуацыі ў Беларусі няшмат.
Апошнім часам рытэйл адчувае сябе бязрадасна. Так, закрылася сетка крамаў Bigzz, фактычна перастала існаваць сетка крамаў «Домашний».
Каментары