Леся Руднік больш не дырэктарка Цэнтра новых ідэй. З арганізацыі сыходзіць Генадзь Коршунаў
Даведаліся, што адбываецца.
Даследчы Цэнтр новых ідэй (ЦНІ) сустракае Новы год з істотнымі зменамі: з пасады дырэктаркі цэнтра сыходзіць Леся Руднік, установу таксама пакідае старшы даследчык, сацыёлаг Генадзь Коршунаў.
«Новага чалавека на пасадзе дырэктара не будзе»
У каментары для «Нашай Нівы» Леся Руднік распавяла, што ідзе з пасады дырэктаркі цэнтра і адыходзіць ад аперацыйнага кіравання ўстановай. Пры гэтым яна застаецца ў складзе рады ЦНІ, куды, акрамя яе, уваходзяць Рыгор Астапеня і Антон Раднянкоў.
«Такое рашэнне я прыняла, бо хачу больш часу прысвячаць акадэмічнай кар’еры ў Швецыі. Пасля абароны сваёй доктарскай і атрымання ступені PhD па паліталогіі ў верасні 2025 я вырашыла рухацца далей па акадэмічным шляху», — расказвае Леся Руднік.
Нядаўна яна атрымала грант ад Swedish Research Council для правядзення ўласнага даследавання. Цяпер Леся Руднік будзе працаваць у Södertörn University (Швецыя), а таксама часткова ў Maastricht University (Нідэрланды).
«Мой праект стаў адным з дзевяці падтрыманых на ўсю Швецыю ў сацыяльных навуках. Буду займацца вывучэннем рэгулявання Big Tech і AI у Еўрасаюзе і некалькіх аўтарытарных краінах», — дадала наша суразмоўца.
Разам з тым гісторыя Лесі Руднік з Цэнтрам новых ідэй не завяршаецца. Яна будзе ўдзельнічаць у стратэгічным развіцці арганізацыі, застаецца кіраўніцай праекта CNI women fellowship і перыядычна будзе далучацца да даследчай працы каманды. Кіраванне ЦНІ зараз будзе адбывацца па крыху іншай унутранай схеме, аднак новага чалавека на пасаду дырэктара не прызначаць. Асноўныя твары цэнтра ў большасці застануцца тымі ж, некалькі новых людзей стануць больш публічнымі.
«За час працы ў ЦНІ шмат чаго адбылося. Арганізацыя ўмацавалася, стала большай, мы рабілі і працягнем рабіць важныя даследаванні і адукацыйныя праграмы. Я асабіста вельмі цешуся тым, як за апошні год мы наладзілі арганізацыйныя працэсы, культуру, узмацнілі даследчую этыку і развіліся як каманда акадэмічна. Асабліва ганаруся і тым, што запусцілі жаночую праграму CNI Women fellowship.
Час у ЦНІ як дырэктаркі быў вельмі важны крок для майго росту, спадзяюся, і для росту арганізацыі таксама. Я ўдзячна сваім калегам за гэтыя гады, за натхненне і за тое, што былі выдатнай камандай», — падсумавала Леся Руднік.
«Маю спадзеў, што тое не канчатковы вырак»
Пра сваё звальненне з Цэнтра новых ідэй паведаміў у фэйсбуку старшы даследчык установы Генадзь Коршунаў, былы дырэктар Інстытута сацыялогіі Акадэміі навук Беларусі.
«Вось і цяпер надышоў час чарговых кар’ерных змен. Час майго супрацоўніцтва з Цэнтрам новых ідэй — доўгі і вельмі плённы — пакуль скончыўся. Шчыра дзякую маім калегам за супрацу! Здаецца, разам мы зрабілі шмат цікавых і карысных праектаў: пра калектыўную траўму, барометр рэпрэсій, беларускую дыяспару, індэкс рэзіліентнасці і шмат іншых», — напісаў сацыёлаг.
У размове з «Нашай Нівай» Генадзь Коршунаў удакладніў, што скончыўся праект, над якім эксперт працаваў апошні год, і разам з ім — этап яго шчыльнай супрацы з ЦНІ.
«Але маю спадзеў, што тое не канчатковы вырак і пры нагодзе з ЦНІ мы яшчэ не раз пасупрацоўнічаем», — падкрэсліў ён.
Цэнтр новых ідэй — беларускі незалежны аналітычны цэнтр, які працуе з 2012 года. Арганізацыя была створаная Рыгорам Астапеням і Антонам Раднянковым як пляцоўка для глыбокага аналізу грамадска-палітычных працэсаў і асэнсавання магчымых шляхоў развіцця Беларусі.
Цэнтр працуе ў трох кірунках: уцягванне грамадства ў абмеркаванне рэформаў і публічную дыскусію, правядзенне незалежных даследаванняў, падтрымка і развіццё новых лідараў.
У сакавіку 2025 года ўлады Беларусі аб’явілі Цэнтр новых ідэй экстрэмісцкім фарміраваннем, а яго інтэрнэт-старонкі — экстрэмісцкімі матэрыяламі.
«Наша Нiва» — бастыён беларушчыны
ПАДТРЫМАЦЬ
Каментары
Нічога сабе, такі гендарны дысбаланс сярод заснавальніка? Калі Антон хаця б у сваім чаце складзе самакрытыку?