Беларуская IT-кампанія адправіла літоўскі экіпаж на ралі «Дакар-2025»
Вядомая беларуская IT-кампанія Gurtam, якая пасля падзей 2020 года рэлакавалася ў Вільню, стала тытульным партнёрам літоўскага экіпажу на знакамітым ралі-рэйдзе «Дакар-2025», які праходзіць у Саудаўскай Аравіі. Каманда выступае пад назвай Gurtam Toyota Gazoo Racing Baltics.
За стырном спартыўнага баліда Toyota Hilux пад нумарам 216 знаходзіцца легенда літоўскага аўтаспорту Бенядзіктас Ванагас, для якога гэта ўжо 14‑ы «Дакар». Яго штурманам стаў дасведчаны Айвідас Палюкенас.
«Глыталі пыл, каб не забіць машыну»
Гонка ў Саудаўскай Аравіі ўжо ў самым разгары. Другі этап ралі ператварыўся для экіпажа ў сапраўднае выпрабаванне на трываласць. Ванагас і Палюкенас выбралі тактыку «выжывання»: яны праехалі 400 кіламетраў па камянях і высахлых рэчышчах рэк, імкнучыся зберагчы тэхніку.
«Гэта былі 400 кіламетраў выжывання. Мы не памыліліся, калі думалі, што будуць дамінаваць камяні, але атрымалі ўсё адразу. Калі я кажу, што мы не едзем на самазнішчэнне, я маю на ўвазе, што мы не хочам вылецець з «Дакара» раней часу», — пракаментаваў этап Бенядзіктас Ванагас.
Не абышлося без прыгод: экіпажу прыйшлося мяняць прабітае кола, а фінішавалі яны з яшчэ адной пашкоджанай шынай. Акрамя таго, літоўцы прапусцілі наперад больш хуткія экіпажы грандаў — Карласа Сайнса і Маціяса Экстрома. Гэта джэнтльменскі ўчынак каштаваў ім бачнасці: большую частку шляху прыйшлося ехаць у густым пыле ад чужых аўто.
Па выніках этапу каманда Gurtam заняла 24‑е месца, адстаючы ад лідара прыкладна на 16 хвілін.
Што звязвае беларусаў і літоўскага гоншчыка?
Гэта не першы досвед супрацоўніцтва: Gurtam стаў партнёрам Ванагаса яшчэ на «Дакары-2024».
Кампанія Gurtam была заснавана ў Мінску ў 2002 годзе Аляксеем Шчурко і ягоным бацькам. Яны стварылі сусветна вядомую сістэму маніторынгу транспарту Wialon, да якой падключана больш за 4 мільёны аўтамабіляў ва ўсім свеце.
У 2020 годзе Шчурко ўваходзіў у першы склад Каардынацыйнай рады. Пасля пачатку рэпрэсій кампанія эвакуявала супрацоўнікаў у Літву. З пачаткам вайны ва Украіне кампанія сышла з расійскага рынку, дзе была лідарам, і ліквідавала там юрыдычную асобу, а ўкраінскім кліентам дала бясплатны доступ да сэрвісаў. Сёння Gurtam уваходзіць у топы найбуйнейшых падаткаплатнікаў Літвы ў IT-сектары.
Заснавальніка Gurtam Аляксея Шчурко і Бенядзіктаса Ванагаса аб'ядноўвае не толькі бізнэс, але і любоў да тэхнікі і хуткасці — абодва захапляюцца пілатаваннем самалётаў. Летась Ванагас нават запісаў вялікае інтэрв'ю з беларускім бізнэсоўцам, дзе той расказаў пра прынцыпы пабудовы кампаніі і жыццё ў эміграцыі.
«Наша Нiва» — бастыён беларушчыны
ПАДТРЫМАЦЬ
Бяляцкі: Не трэба спяшацца адмяняць санкцыі. Бо гэта будзе ўспрынята рэжымам як яго перамога і слабасць Еўропы15
Каментары