Украіна прапанавала ўвесці «іранскую мадэль» санкцый супраць расійскага газу. Што гэта такое?
Гэта азначае, што расійскі газ будзе ісці ў Еўропу, але аплата за яго будзе паступаць не наўпрост у Расію, а на спецыяльныя дэпазітныя рахункі ў еўрапейскіх банках. Так будзе працягвацца да таго часу, пакуль РФ не выканае пэўныя ўмовы. Пра гэта паведаміў намеснік міністра энергетыкі Украіны Яраслаў Дземчанкаў.
Дземчанкаў адзначыў, што расійскі трубаправодны прыродны газ замясціць найбольш складана, бо ён складае 40% агульнага імпарту ЕС.
Ён папракнуў ЕС і, у прыватнасці Германію, за тое, што там «вельмі доўга цэментавалі міф пра тое, што Еўропа памрэ без расійскіх энергарэсурсаў».
Паводле яго слоў, сітуацыя зусім іншая — «расійская энергетыка памрэ без Еўропы».
«Без еўрапейскага рынку расіянам трэба будзе спыніць свае газавыя радовішчы, закансерваваць іх, а потым, калі яны стануць іх аднаўляць, будзе страчана 70% газавых радовішчаў. Таму калі Пуцін вырашыць зблефаваць і спыніць пастаўкі газу ў Еўропу, ён проста разбурыць сваю газавую інфраструктуру», — заявіў намеснік міністра энергетыкі Украіны.
На думку Дземчанкава, Еўропа здольная цалкам адмовіцца ад звадкаванага прыроднага газу (ЗПГ) з Расіі. Летась доля агульнай пастаўкі расійскага ЗПГ складала менш за 8% сусветных паказчыкаў. Амаль палова з гэтага імпартавалася ў Еўропу.
Каментары