Hieroj i vorah Rasiei

Vasila Adryjanava ŭ Kalininhradzie viedaje kožny. Adny ličać jaho palityčnym fanatykam i voraham Rasiei, druhija — dalnabačnym i paśpiachovym moładzievym lideram, budučym prezydentam samastojnaj Uschodniaj Prusii.

Adryjanaŭ z tych ludziej, dla jakich palityka — heta ŭsio. Užo ŭ 16 hod jon staŭ zasnavalnikam palityčnaj arhanizacyi MDR («Moładź za demakratyju i reformy»), z 18 hod braŭ udzieł u vybarach orhanaŭ ułady na roznych uzroŭniach, u 20 hod uziaŭ funkcyi kaardynatara antyvajskovaha ruchu ŭ Kalininhradzkim rehijonie. Jon upeŭnieny, što pry jaho žyćci Kalininhrad atrymaje niezaležnaść. Kaža, što ŭsio idzie da hetaha. Piša Siarhiej Budkin.

Sympatyčnyja elicie

Adryjanaŭ nazyvaje svaju arhanizacyju elitnaj, «bo jana hurtuje vakoł siabie załatuju moładź, intelektualnuju elitu».

U Kalininhradzkaj vobłaści naličvajecca pad 200 moładzievych arhanizacyj (na 215 tysiač maładych ludziej), biez uliku studenckich prafsajuzaŭ. MDR — adna z samych aktyŭnych i aŭtarytetnych. Arhanizacyi sympatyzuje śpikier rehijanalnaha parlamentu — jon navat «pryvioŭ» u MDR svaju dačku.

Hałoŭny trend u dziejnaści bolšaści moładzievych arhanizacyj Kalininhradzkaha rehijonu — separatyzm. «Nas usich pryhniataje Maskva», — taki ahulny nastroj maładych kalininhradzkich palitykaŭ. Hetaje pytańnie łučyć i levych radykałaŭ «nacyjanał-balšavikoŭ», i pravych «emdeeraŭcaŭ» (Adryjanaŭ kaža: «Ja praviejšy za Čubajsa!»).

Vasil bačyć svaju zadaču ŭ «depatryjatyzacyi moładzi». Jon maje na ŭvazie zamienu rasiejskaha patryjatyzmu miascovym. Demilitaryzacyja Kalinhradzkaha rehijonu — adzin z pryjarytetnych kirunkaŭ pracy «emdeeraŭcaŭ». A lozunh arhanizacyi — «Halandyja tut i ciapier». Usie razumiejuć, što rehijon nia moža stać novaj Halandyjaj u składzie Rasiei.

Separatysckija idei ŭ rehijonie stanoviacca ŭsio bolš papularnymi.

Halandyja tut i ciapier

U 1999 h. daśledčy centar «Delta-K» pravioŭ apytańnie kalininhradzkaj moładzi: tady 20% padtrymali ideju niezaležnaści ad Rasiei, u 2003 h. ich stała ŭžo 40%. Sioleta «Kalininhradzkaja manitorynhavaja hrupa» praviała apytańnie na tuju ž temu, i pavodle jaho vyśvietliłasia, što 60% moładzi bačać rehijon aŭtanomnym. Adryjanava vyniki nia dziviać: «U nas hulnia siarod školnikaŭ pravodziłasia ŭ budynku abłasnoha parlamentu pad kiraŭnictvam deputataŭ, u jakoj dzieci ŭmoŭna dzialilisia na try častki — «piloty», «separatysty» i «federalisty». «Piloty» — u niejkaj stupieni kampramisnaja forma pamiž druhimi i trecimi. Kalinhradzkija palityki-«piloty» prapanujuć ščylnaje supracoŭnictva z Eŭropaj pry zachavańni statusu rehijonu ci ŭtvareńnia pad jurysdykcyjaj Rasiei i Eŭropy. Pa sutnaści, jany prapanujuć miakki «separatyscki» varyjant...»

Niedziciačyja hulni

Z federalnymi słužbami ŭ Adryjanava adnosiny napružanyja. Na niekatorych «patryjatyčnych» sajtach jaho proźvišča fihuruje ŭ śpisie «vorahaŭ Rasiei». Adnojčy palityka mocna źbili, i jamu pryjšłosia pralažać dva tydni ŭ balnicy. Vajenny kamisar Kalininhradu Hrabieńnikaŭ pahražaŭ jamu puścić kulu ŭ łob. Dalej za pahrozy sprava nie pajšła. Ale siamju Adryjanaŭ zavodzić pakul nie rašajecca. Kaža, što palityčnuju dziejnaść i siamiejnaje žyćcio nielha sumiaščać.

Ciapier u Kalininhradzie aktyŭna musirujucca čutki pra mahčymuju padrychtoŭku federalnymi słužbami teraktu padčas sustrečy Pucina i Šredera na śviatkavańni 750-hodździa Kalininhradu. Meta — źniasłavić takija arhanizacyi, jak MDR.

«Takija pravakacyi sensu nia majuć, — kaža Adryjanaŭ, — my vystupajem za źmianieńnie sytuacyi mirnym šlacham na ŭzor Polščy-89, Ukrainy». Vasil vieryć prahnozam CRU, što Rasieja spynić svajo isnavańnie ŭ 2015 h., kali raspadziecca na niekalki aŭtanomnych abłaściej: «Jość usie pieradumovy, kab heta zdaryłasia. Ale źnižeńnie imperskich ambicyj Rasiei moža być realizavana tolki pa adpadzieńni Biełarusi», — razvažaje Adryjanaŭ. Na jaho dumku, Biełaruś čakajuć źmieny ŭ 2006 h.

«Nam cikava, jak vyrašycca prablema ŭ vas, chacia b z prahmatyčnych mierkavańniaŭ», — pryznajecca jon. Adryjanaŭ sapraŭdy ŭvažliva sočyć za navinami ź Biełarusi. «Kožnaje zatrymańnie vašych aktyvistaŭ tolki pasłablaje režym. Łukašenka hetaha nie razumieje», — razvažaje jon. Usim biełarusam palityk pažadaŭ pieramahčy svaju bojaź: «Mienavita z hetaha pačynajucca źmieny da lepšaha!»

• 0
• 0
• 0
• 0
• 0
• 0
• 0
• 0