Supracoŭniki narkakantrolu MUS Biełarusi sumiesna z kalehami ź Leninskaha RUUS Minska zatrymali žychara staličnaha rajona Uručča, jaki ŭ siabie doma vyroščvaŭ kanopli.
Jak paviedamlaje ŭpraŭleńnie infarmacyi i hramadskich suviaziej MUS, minčanin byŭ zatrymany ŭ juvielirnaj majsterni pa vulicy Łabanka, dzie pracavaŭ. Tam ža milicyjaniery znajšli marychuanu, jakaja jamu naležyć. Krychu paźniej, pry ahladzie kvatery zatrymanaha, byŭ vyjaŭleny pakoj, śpiecyjalna abstalavany dla vyroščvańnia kanapiel.
Fihurant trapiŭ u pole zroku pravaachoŭnikaŭ letam minułaha hoda, kali praktyčna adnačasova ŭdałosia spynić dziejnaść čatyroch takich «ciaplic» (pa dźvie ŭ Minsku i Michanavičach). U chodzie apieratyŭna-vyšukovych mierapryjemstvaŭ i vyśvietliłasia, što kanaplanyja płantacyi vyroščvalisia pad kiraŭnictvam maładoha čałavieka z Uručča. Jon kansultavaŭ nakont taho, jakuju ziamlu treba brać dla rasady, jakija prystasavańni vykarystoŭvać, zabiaśpiečvaŭ nasieńniem.
Kanfiskavana bolš za 200 hramaŭ marychuany, 11 kustoŭ kanapiel i śpiecyjalnaje abstalavańnie dla jaje vyroščvańnia.
Frunzienskim (Minska) RASK u dačynieńni da zatrymanaha raspačata sprava pa č. 3 art. 328 KK (niezakonny abarot narkatyčnych srodkaŭ, psichatropnych rečyvaŭ i ich prekursoraŭ).
Ministerstva ŭnutranych spraŭ nahadvaje, što štohod z 1 červienia pa 31 žniŭnia ŭ krainie realizujecca śpiecyjalnaja prahrama «Mak». Jaje asnoŭnaj metaj ź`iaŭlajecca spynieńnie faktaŭ raspaŭsiudžvańnia narkasyraviny raślinnaha pachodžańnia, vyjaŭleńnie i źniščeńnie pasievaŭ narkatyčnych kultur.
Dziejnym zakanadaŭstvam za pasieŭ abo vyroščvańnie zabaronienych da vyroščvańnia raślin z metaj zbytu abo vyrabu narkatyčnych srodkaŭ praduhledžana kryminalnaja adkaznaść až da pazbaŭleńnia voli na 15 hadoŭ.
Kamientary