Dźmitryj Baskaŭ pašyraje biznes pad brendam Lepshy

U vieraśni 2022 hoda «Puł pieršaha» anansavaŭ zapusk bombieraŭ pad brendam Lepshy. Realizacyjaj novaha mierča Łukašenki zaniałasia firma «Lepšy brend». Tady paviedamlałasia, što 80% hetaj kampanii naležyć Dźmitryju Baskavu i 20% zapisanyja na niejkuju Marynu Anfiłavu.

U vieraśni 2023 hoda Dźmitryj Baskaŭ zarehistravaŭ novuju jurydyčnuju asobu — «Lepšy chleb», jakaja zajmajecca vytvorčaściu chlebabułačnych i kandytarskich vyrabaŭ.

Na siońnia na bałansie firmy ličacca zahatovačny cech i kaviarnia «Lepšy chleb» u Pieršym nacyjanalnym handlovym domie na praśpiekcie Niezaležnaści, 134, i dźvie piakarni ŭ staličnych handlovych centrach «Skała» (Piatra Hlebki, 5) i «Červieński» (Majakoŭskaha, 6).

60% «Lepšaha chleba» naležać Dźmitryju Baskavu. Astatnija 40% u roŭnych dolach zapisanyja na dvuch biełarusaŭ: Arcioma Vasiljeva i Paŭła Turbana. Apošni, pavodle danych «Kibierpartyzan», pracavaŭ u Fiederacyi chakieja Biełarusi i kucharam u chakiejnym kłubie «Dynama-Minsk».

Druhaja firma — «Lepšy ekipirovačny centr» — źjaviłasia ŭ kancy maja 2025 hoda. Jaje profil — razdrobny handal spartovym abstalavańniem i invientarom.

16 kastryčnika adbyłosia ŭračystaje adkryćcio fłahmanskaj kramy Lepshy hockey — najbujniejšaha ŭ Biełarusi centra prodažu chakiejnaha ryštunku i ekipiroŭki. Handlovy punkt raźmiaściŭsia ŭ «Alimpik-Arenie», jakaja padparadkoŭvajecca Nacyjanalnamu alimpijskamu kamitetu.

«Lepšy ekipirovačny centr» maje troch uładalnikaŭ. 34% naležać Arciomu Zavadskamu. Pavodle źviestak «Kibierpartyzan», Zavadski maje vializny dośvied u handli spartovymi tavarami. Na siońnia jon taksama źjaŭlajecca zasnavalnikam i dyrektaram firmy «Chakiejny kantynient», jakaja maje ŭłasnuju internet-kramu chakiejnaj formy i ekipiroŭki.

 Druhi ŭłaśnik kramy Lepshy hockey — Norbiert Masalski, jahonaja dola 15%. Masalski značycca hienieralnym dyrektaram pradpryjemstva «Sport-luks», jakoje taksama zajmajecca prodažam chakiejnaj ekipiroŭki.

U kancy lipienia 2025 hoda «Sport-luks» paviedamiŭ u svajoj supolnaści va «UKantakcie», što ich krama rearhanizavałasia ŭ Lepshy hockey i pierajazdžaje ŭ «Alimpik-Arenu». Handal chakiejnaj ekipiroŭkaj Norbiert Masalski sumiaščaje z pracaj u Fiederacyi chakieja Biełarusi.

Astatnija akcyi «Lepšaha ekipirovačnaha centra» — 51% — naležać samomu Baskavu.

Jon, darečy, prysutničaŭ na adkryćci kramy asabista i staranna rabiŭ vyhlad, što nie maje nijakaha da jaje dačynieńnia. Dziaržaŭnyja ŚMI ŭ citrach pradstavili Baskava jak «staršyniu Pastajannaj kamisii Savieta Respubliki Nacyjanalnaha schodu Biełarusi pa adukacyi, navucy, kultury i sacyjalnym raźvićci».

«Ja ščyra radujusia, što tut, na cudoŭnym abjekcie «Alimpik-Arena», jość admysłovaja terytoryja, u jakoj luby, ad maleńkaha chłopčyka da darosłaha, ad amatara da prafiesijnaha chakieista KCHŁ, moža znajści ŭsio što treba», — prakamientavaŭ praŭładnamu telekanału STB spartovy funkcyjanier.

Radaść Baskava ad adkryćcia Lepshy hockey padmacavali i finansavyja pakazčyki. Mienš čym za try miesiacy pracy kramy firma «Lepšy ekipirovačny centr» paśpieła vyručyć biez małoha 1,2 miljona rubloŭ, abo amal 350 tysiač jeŭra. Čysty prybytak pa vynikach 2025 hoda skłaŭ 74 tysiačy rubloŭ, abo amal 21,5 tysiačy jeŭra. 

Taki finansavy pośpiech Baskavu & So zabiaśpiečyła ŭ tym liku i dziaržava, pierakładajučy hrošy padatkapłatnikaŭ ź biudžetu ŭ kišeniu treniera siamji Łukašenki. «Biuro» pravieryła tendarnyja zakupki «Lepšaha ekipirovačnaha centra» i vyśvietliła, što za try niapoŭnyja miesiacy 2025 hoda firma Baskava zmahła zaklučyć damoŭ na pastaŭku chakiejnaj ekipiroŭki roznym spartovym arhanizacyjam amal na 450 tysiač biełaruskich rubloŭ, abo na 130 tysiač jeŭra. Da pačatku krasavika 2026 hoda hetaja suma pavialičyłasia ŭžo da 675 tysiač rubloŭ, abo amal da 200 tysiač jeŭra. Vialikaja častka zakupak rabiłasia pa pracedury zakupki z adnoj krynicy. Jana ličycca bolš prostaj i mienš kankurentnaj praceduraj vybaru pieramožcy. 

• 0
• 1
• 1
• 1
• 0
• 0
• 4
• 0