Ekanamičny sud Viciebskaj vobłaści vynies rašeńnie ab pryznańni Viciebskaha AAT «KIM» bankrutam i jaho likvidacyi, paviedamiła sudździa ekanamičnaha suda Iryna Frałova.
Paśla ŭstupleńnia sudovaha vierdyktu ŭ zakonnuju siłu antykryzisny kiraŭnik pavinien prystupić da pahašeńnia zajaŭlenych patrabavańniaŭ amal 90 konkursnych kredytoraŭ u abjomie kala Br306 młrd za košt prodažu majomaści bankruta. U kamitet kredytoraŭ pradpryjemstvy abranyja pradstaŭniki AAT «Bank raźvićcia Respubliki Biełaruś», RUP «Viciebskenierha», AAT «Bielinviestbank», MPZ Biełarusi, FSAN, administracyi SEZ «Viciebsk», prafsajuznaha kamiteta fabryki. Pa słovach antykryzisnaha kiraŭnika Paŭła Zajca, košt asnoŭnych fondaŭ bankruta pa dadzienych buchhałtarskaha ŭliku aceńvajecca ŭ sumu kala Br43 młrd, u tym liku na bałansie pradpryjemstva znachodzicca dva internaty pa 600 miescaŭ kožny, a taksama azdaraŭlenčy łahier u 40 km ad abłasnoha centra, jaki nie ekspłuatujecca try hady. Zaviaršyć likvidacyjnuju praceduru płanujecca da vieraśnia 2016 hoda. Kiraŭnictva akcyjaniernaha tavarystva va ŭzajemadziejańni z harvykankamam, haradskim centram zaniataści i inšymi słužbami prapracoŭvajuć roznyja varyjanty pracaŭładkavańnia rabotnikaŭ.
Jak paviedamiła načalnik upraŭleńnia kaardynacyi raźvićcia trykatažnaj i šviejnaj halin kancerna «Biellehpram» Alena Kucharava, «KIM» pieradaŭ pa damovie ŭ AAT «Ściah industryjalizacyi» (Viciebsk) bolš za 33 mašyn dla arhanizacyi patočnaj linii pa pašyvie trykatažnych vyrabaŭ, kudy ŭžo pracaŭładkavanyja 25 švačak z zbankrutavałaha pradpryjemstva. Akramia taho, zaraz prapracoŭvajucca pytańni pieradačy ŭ kamunalnuju ŭłasnaść dvuch internataŭ, dzie na dadzieny momant pražyvajuć bolš za 1 tys. čałaviek. Akramia taho, pavodle acenki antykryzisnaha kiraŭnika, dla pieradačy ŭ archiŭ dakumientaŭ spatrebicca nie mienš Br500 młn i termin kala paŭhoda. Ekspanaty narodnaha muzieja fabryki, u tym liku kapsuła z pasłańniem naščadkam, jakuju zavieščana adkryć 7 listapada 2017 hoda, mohuć papoŭnić fondy abłasnoha krajaznaŭčaha muzieja.
Pančošna-trykatažnaja fabryka «KIM» («Kamunistyčny Internacyjanał Moładzi», paźniej «Kłasika Industryi Mody») ŭtvoranaja ŭ 1931 hodzie. U 1996 hodzie na bazie majomasnaha kompleksu pradpryjemstva stvorana Viciebskaje AAT «KIM». Sprava ab ekanamičnaj niepłaciežazdolnaści (bankructvie) «KIMa» raspačataja ŭ lutym 2015 pa inicyjatyvie samoha daŭžnika.
Kamientary