Jak kupić kvateru ŭ Minsku, kali niama kamu dapamahčy? Zadajecca pytańniem biełarus, jaki adkładaje pa $1000 u miesiac i ŭsio adno ŭ adčai
Małady čałaviek padličyŭ, što navat pry takim raskładzie nabyć dobruju kvateru ŭ stalicy jon zmoža tolki hadoŭ praź dziesiać.
Minčuk apisaŭ u Treds svaju prablemu z pakupkaj kvatery. Jon nie žanaty, žyvie adzin, a zarobak maje vyšejšy za siaredni i adkładaje pa tysiačy dalaraŭ u miesiac (pry tym što apłočvaje arendu žytła). Ale ź ciapierašnimi cenami, padličyŭ jon, narmalnuju dvuchpakajovuju kvateru za $120 tysiač zmoža kupić tolki praz 10 hadoŭ.
«Ipateka? Pad 20% hadavych u valucie — heta addać banku dźvie takija ž kvatery źvierchu», — razvažaje jon.
«Padkažycie, chto niadaŭna kuplaŭ kvateru ŭ Minsku adzin — jak vy heta prakrucili? Baćki dapamahli? Krypta? Fryłans na Zachad?» — zadajecca pytańniami minčuk.
Biez dapamohi — nijak?
Mnohija ŭ kamientarach pryznajucca, što mieć svajo žytło atrymałasia dziakujučy spadčynie abo dapamozie baćkoŭ.
«Babulina spadčyna dazvoliła kupić kvateru. Hanarycca tut asabliva niama čym, ale častka tryvožnaści syšła. Choć by jość svajo hniazdo», — piša adna z kamientatarak.
Inšyja nie razumiejuć, čamu ludzi nie chočuć brać kredyt.
«Vy nichto nie chočacie brać kredyty i skuholicie, što vam treba dziesiacihodździami źbirać na žyllo. Pakul 10 hadoŭ projdzie, kvatery jašče vyrastuć u canie. Voś ja ŭziała kredyt, u mianie płaciož u miesiac krychu mienšy za 1500 rubloŭ, i ja ŭžo žyvu ŭ svajoj kvatery. Ź ciapierašnimi cenami 1500 — heta ništo, a hadoŭ praz 5 i bolš heta budzie jašče bolšym ničym».
Zaŭvahi pra toje, što źbirać usiu sumu składana, tamu što kvatery jašče i daražejuć, słušnyja. Naprykład, tolki ŭ paraŭnańni z krasavikom 2025 hoda siaredni košt mietra ŭ stalicy vyras na 45%: z 1563 da 2272 dalaraŭ.
Častka kamientataraŭ adznačaje, što ŭ vypadku, kali apłočvaješ arendu, lepiej jak maha chutčej brać kredyt i pierapłačvać pracenty za svajo žytło, čym płacić za arendu čužoha.
«Biarycie ŭ kredyt, inflacyja ŭsio źjadaje, ceny na kvatery niaŭmolna rastuć. Tak vy płacicie dziadźku za arendu i ŭ vyniku zastajaciesia ni z čym, a tak budziecie płacić za svajo, choć i ź pierapłataj, ale heta ŭžo vaša. Nazapasili na pieršy płaciož — i napierad! Lepš žyć tut i ciapier, čym źbirać, bo nieviadoma, što budzie», — razvažaje kamientatarka.
«Źbirajcie. Ale ŭ momant, kali płaciož pa kredycie zraŭniaŭsia b z arendnaj płataj, ja b užo kuplała svaju», — raić inšaja.
Bolšaść ludziej dzielicca, što nabyli kvateru ŭ kredyt i zadavolenyja, što heta zrabili, choć napačatku było strašna i składana.
«Biarycie ipateku ŭ biełaruskich rublach i nie dumajcie, nie ličycie «pierapłatu» ŭ kvaterach, vy budziecie płacić za svajo žyllo. Inflacyju taksama nichto nie admianiaŭ. Uziali 5 hadoŭ tamu, z 2200 płaciažy stali 1500 za 5 hadoŭ, całkam kamfortna pry vašym dachodzie. Pačnicie z adnapakajoŭki, ale prosta pačnicie. Nie paškadujecie», — dzielicca dośviedam žančyna.
Taksama niaredka rajać nabyć niešta biudžetnaje i paśla pacichu rabić ramont, praciahvać nazapašvać, a potym pradavać i kuplać bolš prystojnaje.
Try hady na łajniery — i $100 tysiač u kišeni
Adhuknułasia ŭ kamientarach i ryełtarka pa nieruchomaści.
«U mianie adna ździełka była, tam dziaŭčyncy vosiem svajakoŭ hrošy na kvateru źbirali, i ŭsio roŭna na častku sumy jana ŭziała kredyt. I bolšaść ździełak kredytnyja (tak, zvyčajna ŭ kredyt biaruć da 30 pracentaŭ ad koštu, kali ŭžo nadakučyła płacić za zdym). Za najaŭnyja byli maładyja chłopcy ź biznesam (abo ajciška), 25+ hadoŭ», — raspaviadaje ryełtarka, jakaja sama razam z mužam spačatku 10 hadoŭ źbirała na pieršuju kvateru i paśla 10 hadoŭ — na novuju, bolš prastornuju.
A jość i tyja, chto prapanuje adpravicca na zarobki. Adna z kamientatarak pryvodzić u prykład svajho brata, jaki, ź jaje słoŭ, za try hady pracy na łajniery naźbiraŭ 100 tysiač dalaraŭ na ŭłasnuju kvateru.
«Pracavaŭ na łajniery. Pražyvańnie i charčavańnie biaspłatnaje. Źbiraŭ 3 hady — i 100 tys. dalaraŭ u kišeni».
«Źbirajcie valutu i čakajcie abvału»
Častka kamientataraŭ naohuł ličyć, što ciapier nie lepšy čas zachodzić na rynak nieruchomaści. Maŭlaŭ, chutka ceny pojduć uniz, jak heta było ŭ Biełarusi paśla 2007 i 2013 hadoŭ.
«Rynak nieruchomaści ruchajecca pa śpirali hetak ža, jak i ekanomika RB. Čym dalej jany adciahvajuć devalvacyju, tym hłybiej jana budzie. A razam z abvalnaj devalvacyjaj rynak nieruchomaści adkarektujecca. Tak užo było i nie adzin raz. Tamu adkładajcie jeŭra / franki i žyvicie žyćcio», — piša adzin z kamientataraŭ.
«Źbirajcie valutu i čakajcie abvału. Heta budzie davoli chutka», — dadaje inšy.
Znachodziacca i tyja, chto raić nabyć učastak ziamli i ŭžo pa miery źjaŭleńnia srodkaŭ pastupova budavać dom.
Kamientatar z Homiela naohuł ličyć, što nie abaviazkova imknucca žyć u Minsku ź jaho vysokimi cenami na žytło.
«Usio prosta. Žyć u Homieli ŭ svajoj ułasnaj kvatery. Pracavać na zamiežnuju kampaniju, nie pradstaŭlenuju ŭ Biełarusi (pracadaŭcu ŭsio roŭna, ź jakoha vy horada, taryfnaja sietka pa zp budzie adna i taja ž), i kłaści bołt na Minsk. Sens ad Minska mnie tut naohuł nie zrazumieły», — piša hamialčuk.
Ciapier čytajuć
Jak kupić kvateru ŭ Minsku, kali niama kamu dapamahčy? Zadajecca pytańniem biełarus, jaki adkładaje pa $1000 u miesiac i ŭsio adno ŭ adčai7
Jak kupić kvateru ŭ Minsku, kali niama kamu dapamahčy? Zadajecca pytańniem biełarus, jaki adkładaje pa $1000 u miesiac i ŭsio adno ŭ adčai
«Dziaŭčyna niedzie praź siem siekund užo pikiravała bieź piłota». Siabar deltapłanierysta, jaki raźbiŭsia ŭ Stročycach, raskazaŭ, što pryviało da trahiedyi44
«Dziaŭčyna niedzie praź siem siekund užo pikiravała bieź piłota». Siabar deltapłanierysta, jaki raźbiŭsia ŭ Stročycach, raskazaŭ, što pryviało da trahiedyi4
«Šmatpartyjnaść, pluralizm mierkavańniaŭ — heta brachnia, zachodniaja brachnia». Łukašenka razhladaje kanstytucyjnaje viartańnie da savieckaj sistemy8787
Kamientary
Dołhosročnyj rost vozmožien tolko pri smienie vłasti i povorotu na zapad.