Adzin ź viadučych suśvietnych vytvorcaŭ spartyŭnaha adzieńnia i abutku Nike zajaviŭ, što spyniaje kantrakt ź filipinskim baksioram Meni Pakjaa paśla jaho niehatyŭnych vykazvańniaŭ na adras homaseksuałaŭ. Pra heta paviedamlaje Reuters.
«My ličym kamientary Pakjaa ahidnymi», — adznačyŭ pradstaŭnik Nike u dasłanaj pa elektronnaj pošcie zajavie. U kampanii dadali, što damoŭnych adnosin sa spartsmienam u jaje bolš niama.
Kampanija pryniała rašeńnie na nastupny dzień paśla taho, jak u internecie źjaviłasia pietycyja z zaklikam spynić pryciahvać Pakjaa da prasoŭvańnia pradukcyi. Na momant publikacyi naviny pietycyju padpisali bolš za 4 tysiačy čałaviek.
Pakjaa, pavažany na Filipinach baksior i člen kanhresa respubliki, sutyknuŭsia z asudžeńniem hramadskaści paśla taho, jak u 30-siekundnym intervju miascovamu telebačańniu vykazaŭsia suprać adnapołych šlubaŭ.
«Vy choć raz bačyli žyvioł, jakija budujuć siemji z asobinami svajho ž połu? U hetym płanie jany lepšyja za ludziej, kali mohuć adroźnić samku ad samca. Kali my ŭchvalajem adnapołyja šluby, značyć, ludzi horšyja za žyvioł», — zajaviŭ baksior ŭ paniadziełak, 15 lutaha.
U aŭtorak Pakjaa prynios publičnyja prabačeńni. «Ja prašu prabačeńnia za toje, što nanios traŭmy ludziam, kali paraŭnaŭ homaseksuałaŭ z žyviołami. Kali łaska, prabačcie mnie tyja, kaho ja abraziŭ», — zajaviŭ jon u Twitter. Pry hetym jon padkreśliŭ, što zastajecca praciŭnikam adnapołych šlubaŭ.
U pradstaŭnikoŭ filipinskaj arhanizacyi pa abaronie pravoŭ hiejaŭ słovy Pakjaa vyklikali abureńnie. Jany zaklikali vybarščykaŭ nie hałasavać za spartoŭca, jaki na travieńskich vybarach pazmahajecca za miesca ŭ sienacie.
Na Filipinach, dzie bolš za 80 adsotkaŭ nasielnictva vyznajuć katalicyzm, adnapołyja šluby nie dapuskajucca.
9 krasavika baksior płanuje pravieści apošni boj u karjery. Jaho supiernikam budzie amierykaniec Cimaci Bredli. Usiaho na prafiesijnym rynhu filipiniec pravioŭ 65 bajoŭ, u jakich atrymaŭ 57 pieramoh, u tym liku 38 — nakaŭtam. U šaści pajadynkach Pakjaa paciarpieŭ parazu, jašče dva zaviaršylisia ŭničyju.
Svajak Viktara Łukašenki zabraŭ budynak u dziciačaj palikliniki i adkryŭ tam adździaleńnie KDB, dzie dapytvajuć biełarusaŭ6
Kamientary