Namieśniku Milinkieviča zakidajuć złačynstvy, ździejśnienyja... u 6 hadoŭ

Namieśnika kiraŭnika Ruchu «Za Svabodu» Jurasia Hubareviča padazrajuć u złačynstvach, ździejśnienych, kali palityku było 6 hod.

U 2007 hodzie ŭ sakaviku napiaredadni viesnavych akcyj pratestu na chatni adras Jurasia Hubareviča ŭ Biełaaziorsk zavitali supracoŭniki milicyi. Pa słovach maci palityka, niečakanyja hości chacieli ŭziać tłumačeńni pa spravie sieryjnych zhvałtavańniaŭ u Ivacevickim rajonie Bresckaj vobłaści.

Roŭna praz hod damoŭ da Jurasia Hubareviča pryjšoŭ učastkovy Biełaaziorskaha HAUS M. Vałoščyk. Jon chacieŭ sustrecca ź Jurasiom pa toj samaj spravie zhvałtavańniaŭ, ale ŭžo ŭ Drahičynskim, Biarozaŭskim i Minskim rajonach. Dakładna viadoma, što ciažkija złačynstvy ažyćciaŭlała adna asoba, hienatyp jakoj ustanoŭleny. Sa słoŭ učastkovaha, sieryja zhvałtavańniaŭ doŭžyłasia ad 1984 da 1994 hoda.

Juraś Hubarevič nakiravaŭ skarhu ŭ prakuraturu Biarozaŭskaha rajona na dziejańni milicyjantaŭ. Spadar Hubarevič pasprabavaŭ daznacca, ci nasamreč isnuje takaja kryminalnaja sprava, u jakim statusie jon prachodzić pa hetaj spravie, nakolki zakonnyja ŭ dačynieńni da jaho dziejańni supracoŭnikaŭ milicyi.

U adkazie z prakuratury Biarozaŭskaha rajona paviedamlajecca, što parušeńniaŭ zakanadaŭstva z boku ŭčastkovaha inśpiektara Vałoščyka nie vyjaŭlena. Prakuror M. Kuryłovič tłumačyć, što ŭ miežach apieratyŭna‑pošukavych mierapryjemstvaŭ pravodzicca pravierka niekalkich socień čałaviek, jakija pražyvali ŭ Biarozaŭskim rajonie, a paśla ŭ Minsku i Minskaj vobłaści.

— Ja liču heta pieraśledam za svaju palityčnuju dziejnaść. Rasceńvaju dziejańni milicyi, jak sprobu štohodniaha maralna‑psichałahičnaha cisku na mianie napiaredadni śviatkavańnia Dnia Voli i praviadzieńnia Čarnobylskaha šlachu, — kaža palityk.

Palityk akcentuje ŭvahu na tym, što milicyjanty, jakija chacieli pravieryć jaho na datyčnaść da złačynstva, u 2007 i 2008 hadach nazyvali roznyja miescy ich ździajśnieńnia. Juraś Hubarevič adznačaje, što da 1994 hoda, kali ŭžo adbyvalisia ŭzhadanyja złačynstvy ŭ Minsku, jon nie pražyvaŭ na terytoryi Minskaj vobłaści. Da taho ž, kali pačałasia sieryja zhvałtavańniaŭ u 1984 hodzie, Jurasiu Hubareviču było… 6 hod.

— Ciapier ja źbirajusia aznajomicca z materyjałami pravierki rajonnaj prakuratury. Ja chaču daznacca, ci isnuje sapraŭdy zahad namieśnika ministra ŭnutranych spraŭ praviarać śpis ź niekalkich sot čałaviek na ich datyčnaść da zhvałtavańniaŭ, jak piša ŭ svaim liście rajonny prakuror, ci jość naohuł taki śpis i na jakoj padstavie ja ŭ jaho ŭniesieny.

milinkevich.org

• 0
• 0
• 0
• 0
• 0
• 0
• 0
• 0