Pravacentrysty zaklikali supracoŭnikaŭ milicyi nie ŭdzielničać u falsifikacyjach vybaraŭ

Pradstaŭniki pravacentrysckaj kaalicyi praviali 28 lipienia ŭ centry Minska, niepadalok ad budynka MUS, pikiet, na jakim zaklikali supracoŭnikaŭ milicyi pieraškadžać falsifikacyjam vybaraŭ.

Pikiet prachodziŭ u formie zboru podpisaŭ za vyłučeńnie kandydatam u deputaty staršyni Minskaj haradskoj arhanizacyi Ab`iadnanaj hramadzianskaj partyi Mikałaja Kazłova.

Akramia AHP u pravacentrysckuju kaalicyju ŭvachodziać ruch «Za Svabodu» i arhkamitet pa stvareńni partyi «Biełaruskaja chryścijanskaja demakratyja».

Padčas pikieta jaho ŭdzielniki padpisali zvarot na imia ministra ŭnutranych spraŭ Ihara Šunieviča i pieradali jaho ŭ pryjomnuju dla hramadzian. U zvarocie adznačajecca, što ŭ suviazi z tym, što padčas vybarčaj kampanii naziralnikami nieadnarazova vyjaŭlalisia vypadki falsifikacyi vybaraŭ, manipulacyi hałasami vybarščykaŭ padčas padliku biuleteniaŭ, padčas daterminovaha hałasavańnia i hałasavańnia pa miescy žycharstva, uźnikajuć pytańni adnosna dziejnaści supracoŭnikaŭ milicyi, jakija achoŭvajuć vybarčyja ŭčastki i skryni dla hałasavańnia.

Na dumku aŭtaraŭ zvarotu, supracoŭniki milicyi nie nacelenyja na papiaredžańnie i spynieńnie złačynstvaŭ, praduhledžanych art. 192 KK (parušeńnie zakanadaŭstva ab vybarach). Jany ličać, heta vyklikana tym, što, zastupajučy na dziažurstva, milicyjanier atrymlivaje ŭkazańni, jakija faktyčna pieravodziać jaho ŭ padparadkavańnie vybarčaj kamisii, takim čynam robiačy jaho saŭdzielnikam złačynstva.

Aŭtary zvarotu prapanujuć ministru vydać zahad, u jakim asobnym punktam budzie patrabavańnie pryniać usie miery dla spynieńnia złačynstvaŭ, praduhledžanych artykułam 192 KK, a ŭ vypadku ich vyjaŭleńnia — nieadkładna raspačynać kryminalnyja spravy ŭ dačynieńni da vinavatych asob. Taksama jany patrabujuć pravieści dbajnaje rasśledavańnie pa ŭsich zajavach ab falsifikacyi na prezidenckich vybarach 2015 hoda.

«U Biełarusi stvoranaja sistema falsifikacyj na vybarach, i milicyja ź`iaŭlajecca jaje častkaj, — zajaviŭ žurnalistam staršynia AHP Anatol Labiedźka. — My zaklikajem supracoŭnikaŭ milicyi nie padmanvać siabie, svaich rodnych i znajomych. Kali jany nie buduć heta rabić, falsifikacyi ź biuleteniami nie buduć adbyvacca. Nie dumaju, što my dastukajemsia svaim zvarotam da Šunieviča, ale, mahčyma, šarahovyja supracoŭniki milicyi źviernuć na jaho ŭvahu».

Pikiet doŭžyŭsia pryblizna paŭhadziny. Paśla jaho da ŭdzielnikaŭ padyšoŭ člen Staravilenskaj akruhovaj kamisii Andrej Jeśman. Jon zajaviŭ, što pikietoŭcy parušajuć zakanadaŭstva. U pryvatnaści jon ličyć, što jany znachodzilisia na adlehłaści nie 50 mietraŭ, jak hetaha patrabuje zakanadaŭstva, a 45 mietraŭ ad budynka MUS. Jeśman skazaŭ, što pra parušeńnie jamu paviedamiŭ pa telefonie niejki hramadzianin.

• 0
• 0
• 0
• 0
• 0
• 0
• 0
• 0