Biełaruś skaraciła pastaŭki naftapraduktaŭ u Rasiju na 56%, va Ukrainu — pavialičyła na 64%
U pieršym paŭhodździ Biełaruś istotna źniziła ekspart naftapraduktaŭ na rasijski rynak, ale pry hetym rezka pavialičyła ich pastaŭki va Ukrainu, śviedčać źviestki aficyjnaj statystyki.
Ahulny ekspart biełaruskich naftapraduktaŭ u pieršaj pałovie 2016 hoda praktyčna nie źmianiŭsia ŭ paraŭnańni sa studzieniem—červieniem 2015 hoda i skłaŭ 8,9 młn. ton. U hrašovym vyražeńni biełaruski ekspart naftapraduktaŭ na fonie źnižeńnia suśvietnych cen skaraciŭsia na 35% da 2,45 młrd. dołaraŭ.
Pry hetym abjomy pastavak biełaruskich naftapraduktaŭ na susiednija rynki byli istotna pierahledžanyja.
Ekspart naftapraduktaŭ u Rasiju skłaŭ 163,6 tys. ton, skaraciŭšysia ŭ fizičnym vyražeńni na 56% u paraŭnańni z anałahičnym letašnim pieryjadam. U hrašovym vyražeńni ekspart źmienšyŭsia na 62% da 53,3 młn. dołaraŭ.
Va Ukrainu, naadvarot, Biełaruś istotna pavialičyła ekspart naftapraduktaŭ: za studzień—červień ich realizavana bolš za 2,2 młn. ton (+64%). U vyniku, niahledziačy na źnižeńnie cen, ekspart u hrašovym vyražeńni pavialičyŭsia na 4% da 823,4 młn. dołaraŭ.
U lipieni ŭkrainskija ŚMI paviedamlali, što Biełaruś prypyniała pastaŭki naftapraduktaŭ va Ukrainu z-za rašeńnia Rasii źmienšyć pastaŭki nafty na biełaruskija naftapierapracoŭčyja zavody. Paśla niepraciahłaj paŭzy pastaŭki na ŭkrainski rynak byli adnoŭlenyja.
«Ukraina zastajecca dla Biełarusi samym likvidnym rynkam. Tamu navat u vypadku abmiežavańnia impartu rasijskaj nafty Biełaruś budzie zacikaŭlenaja pradavać naftapradukty Ukrainie prosta tamu, što za biełaruskaje paliva my płacim bolš, čym inšyja pakupniki», — zajaviŭ u kamientaryi BiełaPAN Siarhiej Kujun, dyrektar ukrainskaj kansałtynhavaj hrupy «A-95», jakaja śpiecyjalizujecca na vyvučeńni miascovaha rynku naftapraduktaŭ.
U lipieni Rasija vyrašyła skaracić na tracinu pastaŭki nafty ŭ Biełaruś. Padstavaj staŭ rost zapazyčanaści Minska za haz. Akramia taho, Minenierha Rasii matyvavała pryniataje rašeńnie tym, što biełaruski bok nie vykonvaje abaviazacielstvy pa pastaŭkach naftapraduktaŭ na rasijski rynak. Mierkavałasia, što Biełaruś pastavić ŭ 2016 hodzie Rasii 1 młn. ton bienzinu, adnak biełaruski ŭrad u pačatku hetaha hoda zajaviŭ, što cenavyja ŭmovy pastavak paliva na rasijski rynak Biełarusi niavyhadnyja.
Ciapier čytajuć
Brat Koli Łukašenki buduje farmaceŭtyčny kompleks za $10 miljonaŭ3
Brat Koli Łukašenki buduje farmaceŭtyčny kompleks za $10 miljonaŭ
I pra realnych bandytaŭ, i pra kryvarukaha Kościu-plitačnika, i pra seks u ciahniku. Žurnalistka z Homiela napisała knihu — čytać jaje strašna i śmiešna99
Kamientary