Džon Krejh, jaki zajmaŭsia dajvinham la bierahoŭ Aŭstralii, prapłyŭ 7,5 kiłamietra, ratujučysia ad tyhrovaj akuły. Pa słovach brytanca, «cikaŭnaja drapiežnica» niekatory čas supravadžała jaho da bieraha, paviedamlaje VVS.
Jachta, ź jakoj nyraŭ 34-hadovy brytaniec, adyšła ad bieraha na 7,5 kiłamietra i stała ŭ zalivie Šark za 800 kiłamietraŭ ad Pierta. Zaliŭ, nazva jakoha pierakładajecca jak «Akułavaja buchta», štohod pryciahvaje kala 120 tysiač turystaŭ.
Daśviedčany vadałaz Krejh pahruziŭsia z harpunom, ale kali ŭspłyŭ na pavierchniu, jachty pobač užo nie było. Krejh pačaŭ klikać na dapamohu — i raptam zaŭvažyŭ pobač z saboj akułu.
«Jana była vielmi blizka i prajaŭlała cikaŭnaść — padpłyvała da mianie z roznych bakoŭ. Jana sprabavała vyznačyć, chto ja i ci možna mianie źjeści», — raspaviadaje Krejh.
Pa słovach brytanca, akuła była dosyć bujnoj — kala čatyroch mietraŭ u daŭžyniu, što adpaviadaje siaredniamu pamieru darosłaj asobiny.
«Tut ja padumaŭ, što mnie kaniec — ja na adlehłaści čatyroch mil ad bieraha, a mianie pieraśleduje vielizarnaja tyhrovaja akuła. Ja padumaŭ, što ŭsio skončana, što tak ja i pamru», — kaža Krejh.
Napałochany brytaniec kinuŭsia ŭpłaŭ. Praź niekatory čas jon zaŭvažyŭ na haryzoncie čyrvonyja skały paŭvostrava Pieron i nakiravaŭsia da ich.
Akuła pieraśledavała Krejha na praciahu 15 chvilin, ale nie napadała. «Kali ja aziraŭsia, ja bačyŭ mordu akuły, jakaja vypłyvała ź imhły i amal datykałasia da maich łastaŭ, jana płyła za mnoj», — raspaviadaje dajvier.
Krejhu u niejki momant zdałosia, što akuła supravadžaje jaho da bieraha, ale praź niekatory čas jana źnikła.
Praz try hadziny Krejh dasiahnuŭ bieraha. Adtul jon ubačyŭ samaloty i łodki, jakija ŭdzielničali ŭ pošukavaj apieracyi na mory. Pryciahnuć da siabie ŭvahu vyratavalnikaŭ Krejhu nie ŭdałosia, i jon pajšoŭ pieššu ŭ kirunku turystyčnaj bazy.
Praz paŭhadziny Krejha zaŭvažyli z pavietra, a jašče praź niekatory čas da bieraha pryčaliła łodka z vyratavalnikami.
«Mnie nie vieryłasia, što niechta zdolny prapłyści takuju adlehłaść za hetak karotki čas. Napeŭna, kali ciabie padhaniaje akuła, […] heta niešta nakštałt treniera», — prakamientavaŭ zdareńnie vyratavalnik Hlen Rydžli.
Ciapier čytajuć
Unikalnyja zdymki budaŭnictva Staroha mosta ŭ Hrodnie. Chto fatahrafavaŭ niebiaśpiečnyja kiesony, u jakich ludzi ryzykavali na dnie Niomana, kab pastavić apory? ŠMAT FOTA77
Kamientary