Ad ranicy 7 žniŭnia prachodziać pieratrusy ŭ redakcyjach TUT.baj i BiełaPAN, zatrymany šerah redaktaraŭ. Ich vinavaciać u niesankcyjanavanym dostupie da infarmacyjnaj stužki dziaržaŭnaha ahienctva BiełTA.
U razmovie z «Našaj Nivaj» dyrektar BiełTA Iryna Akułovič skazała, što nie moža nazvać pamier škody.
Čytajcie: Dyrektarka BiełTA patłumačyła, navošta napisała zajavu, ź jakoj zakruciłasia kryminalnaja sprava suprać TUT.by i «BiełaPANa»
My pasprabavali padličyć sami — pazvanili ŭ adździeł markietynhu BiełTA, kab daviedacca ceny na padpisku.
Tam jość niekalki opcyj: infarmacyjnaja stužka, «Kalandar dat i padziej», «Anonsy — padziei tydnia», «Anonsy — padziei dnia».
Pryvodzim stenahramu razmovy sa śpiecyjalistam adździełu dla poŭnaha razumieńnia:
NN: Takoje pytańnie: kolki kaštuje padpiska na vašuju infarmacyjnuju stužku?
Markietynh BiełTA: Vy rajonnaja hazieta?
NN: Respublikanskaja.
Markietynh BIEŁTA: Respublikanskaja… Adnu siekundu. Nakład jaki ŭ vas?
NN: My skasavali papiarovuju viersiju, isnujem u vyhladzie partała.
Markietynh BiełTA: Stužka budzie raźmiaščacca na sajcie?
NN: Tak.
Markietynh BIEŁTA: Ta-a-ak(0:46 siek razmovy).
*****
NN: Moža, vy nam na faks prejskurant dašlacie, kab nie čakać? (1:25 siek razmovy)
Markietynh BiełTA: Nie, u nas niama prejskuranta. Ja vam canu ahuču, tak (1:32 siek razmovy). Z mahčymaściu raźmiaščeńnia na sajcie da 300 paviedamleńniaŭ u miesiac — źnižka 43%.
NN: U honar čaho źnižka?
Markietynh BiełTA: Z ulikam taho, što my abmiažoŭvajem… Da 300 paviedamleńniaŭ — 43% źnižka. Atrymlivajecca z PDV 418 rubloŭ 61 kapiejka.
NN: Jak źnižka dziejničaje? Kali my padklučymsia, to vy zmožacie potym skasavać jaje?
Markietynh BIEŁTA: Vy atrymlivajecie dostup — łahin i parol dla sajta dla padpisantaŭ, vy možacie usioj hetaj infarmacyjaj karystacca. Umoŭna, 10 na dzień ci 20, ale nie bolš za 300 na miesiac. Kali ad 300 da 600 — to 550 rubloŭ 80 kapiejek. Poŭnuju, stapracentnuju stužku my nie dajom.
NN: U vas jość jašče anonsy, kalendary. Kolki heta kaštuje?
Markietynh BiełTA: Kalandar dat i padziej — 66 rubloŭ na miesiac, anonsy dnia i tydnia — kožny pa 27 rubloŭ 36 kapiejek na miesiac.
NN: Ja ŭdakładniu pytańnie pra źnižku. Jaki miechanizm źnižki? Vy možacie jaje adklučyć?
Markietynh BiełTA: Pieryjadyčna našy praviarajuć, pa-pieršaje, spasyłku na BiełTA pry kožnym raźmiaščeńni infarmacyi. My padklučajemsia da vašaha sajta, zapuskajem pravierku, kolkaść spasyłak i aŭtentyčnaść infarmacyi praviarajem. My nie adklučajem padpisantaŭ, ale kali vy pierajšli limit, to tam sankcyi pavodle damovy.
NN: Ja kažu pra źnižku.
Markietynh BiełTA: I ja kažu pra źnižku. Vy raźmiaščajecie 300 paviedamleńniaŭ, i na hetym spyniajemsia. My prapisvajem u damovie, i vy musicie adpaviadać, prosta našaja techničnaja słužba praviaraje. Dostup da sajta my nie adklučajem.
NN: Kali my nie budziem pierabolšvać, to vy nie adklučycie?
Markietynh BiełTA: Nie, my pakidajem.
NN: Bieź źnižki kamu vy dajacie?
Markietynh BIEŁTA: Bieź źnižki dla haziet… Bieź źnižki pracujuć infarmacyjnyja ahienctvy i teleradyjokampanii.
Kamientary