Uciekačy z mahiloŭskaj śpiecvučelni chavalisia ŭ Maskvie. Ich viarnuli na radzimu
Źbiehłych 30 žniŭnia hadavancaŭ mahiloŭskaj specvučelni № 2 adšukali ŭ Maskvie na adnoj z budoŭlaŭ. Tam jany ŭładkavalisia padsobnymi rabotnikami, piša «Svaboda».
Pavodle Ŭpraŭleńnia ŭnutranych spravaŭ Mahiloŭskaha abłvykankamu, na śled traich uciekačoŭ vyjšli 8 vieraśnia. Jany pieradadzienyja pradstaŭnikam specvučelni.
17-hadovyja chłopcy nie viarnulisia ŭ specvučelniu z padletkavaha letnika «Adradžeńnie», pry Mahiloŭskaj jeparchii Mścisłaŭskaha rajona
Mieściŭsia lahier na samaj miažy z Rasiejaj — za dziesiać kilametraŭ ad Mścisłava, na terytoryi Pustynkaŭskaha mužčynskaha klaštara. Dvaim uciekačam zastavałasia prabyć u zakrytaj adukacyjnaj ustanovie mieniej za dva miesiacy.
Jakoje pakarańnie za ŭcioki padletkam pahražaje pakul nieviadoma. Dvoje źbiehłych byli adpraŭlenyja ŭ specvučelniu za kradziež, jašče adzin skraŭ transpartny srodak.
Adzin ź ciapierašnich uciekačoŭ sioleta byŭ pryznany paciarpiełym u spravie ab pieravyšeńni słužbovych paŭnamoctvaŭ byłym dyrektaram specvučelni Aleham Małaškinym, a taksama dvuma jaho namieśnikami Valeryjem Baravikovym i Alaksandram Doŭhim. Hetuju spravu ciapier razhladaje Čavuski rajonny sud.
U hetaha chłopca ŭ Maskvie pracujuć dvoje starejšych bratoŭ. U hutarcy z karespandentam «Svabody» jahonyja baćki vykazali zakłapočanaść, što za hetyja ŭcioki jaho mohuć źbić, jak i hod tamu.
26 listapada 2017 hodu šaściora navučencaŭ navažylisia na ŭcioki. Praz try hadziny ich adšukali i viarnuli nazad. Jak daviedalisia baćki, ich dziaciej pa adnym zavodzili ŭ pakoj, dzie nie było videanazirańnia, i troje supracoŭnikaŭ vučelni ich źbivali. Adnamu paškodzili chrybietnik.
Svajačka adnaho z byłych navučencaŭ, jakaja pažadała nie nazyvać svajho imia, paviedamiła, što źjechać u Rasieju źbiralisia ŭciekačy i letaś. Sami ž navučency nastojvali, što navažylisia na ŭcioki, kab paviedamić milicyi pra nadta žorstkaje abychodžańnie ŭ specvučelni i svavolu kiraŭnictva. Žurnalistaŭ chłopcy zapeŭnivali, što ŭciakać bolš nia buduć.
Dziaržaŭnaja specyjalnaja prafesijna-techničnaja vučelnia zakrytaha typu № 2 drevapierapracoŭki stvoranaja dla «vyrašeńnia zadač sacyjalnaj reabilitacyi, karekcyi i ŭtrymańnia padletkaŭ, jakija ździejśnili hramadzka niebiaśpiečnyja ŭčynki albo parušyli praviły hramadzkich pavodzinaŭ». U vučelniu nakiroŭvajucca chłopcy ad 14 da 18 hadoŭ terminam na dva hady.
U vice-śpikierki Kaardynacyjnaj rady Lizaviety Prakopčyk sabrałasia $12 tysiač daŭhoŭ94
Kamientary