Kaścioł dałučyŭsia da patrabavańnia hramadzianskich svabodaŭ

2300 biełarusaŭ udzielničali ŭ sustrečy z papam u Varšavie – heta źviestki polskaje pamiežnaje słužby. Sapraŭdy, na placy Piłsudzkaha skroź byli bieł-čyrvona-biełyja ściahi. Jak vidna, biełarusy mocna pryviazalisia da svaich nacyjanalnych koleraŭ. Biełaruskaja mova była adnoj z troch, jakija ŭžyvalisia na varšaŭskim nabaženstvie. Akramia jaje, malitvy hučali pa-polsku i pa-anhielsku. Vykarystańnie biełaruskaj movy Kaściołam staje dobraju tradycyjaju. Heta važnaja aznaka jaje adradžeńnia.

Ale nia heta pryciahnuła najbolšuju ŭvahu padčas pieršaha vialikaha vizytu papy.

Malitvu na biełaruskaj movie pračytaŭ biełaruski student z Varšavy Źmicier Hurnievič – były palitviazień turmy na Akreścina. Z papskaha aŭtara pa-biełarusku prahučaŭ zaklik malicca za svabodu i čałaviečuju hodnaść: «Pamiatajučy pra toje, što ludzi roznych rasaŭ, nacyjanalnaściaŭ i narodaŭ źjaŭlajucca adnoj siamjoj, molimsia za svabodu i pašanu hodnaści kožnaha čałavieka, asabliva ŭ tych krainach, dzie parušajucca i abmiažoŭvajucca hramadzianskija pravy – kab nichto nie ciarpieŭ ad prymusu, dyskryminacyi i pryčynienaj kryŭdy».

Vybar Źmitra Hurnieviča byŭ zrobleny kali nie samimi biełaruskimi biskupami, dyk ź ichnaha viedama, a tamu nia moža być vypadkovym.

Dahetul ułady z Kaściołam ličylisia i na kanflikt nie išli, kali nia brać pad uvahu šavinistyčnych štučak kštałtu padručnika historyi Traščanka. A Kaścioł byŭ aściarožny i ŭnikaŭ temy pravoŭ čałavieka. Ciapier z boku Kaściołu prahučała vyraznaje pasłańnie salidarnaści i pratestu. Kaścioł zrabiŭ jaho ŭ strymanaj i niepalityzavanaj formie. Paśla vybaraŭ, a nia pierad imi. Paśla Płoščy, dzie niekatoryja ksiandzy vyrašyli zastavacca z svaimi viernikami.

U siłu histaryčnych abstavinaŭ, biełaruski Kaścioł nia moža być pa-za ŭpłyvam polskaha ŭsprymańnia sytuacyi ŭ Biełarusi. Ale darma śpisvać nastroi ŭ im tolki na zamiežny ŭpłyŭ. Heta taksama adbitak prychilnaściaŭ małodšaha pakaleńnia biełaruskich ksiandzoŭ i śvieckaha aktyvu, z pakaleńnia niezaležnaści. Kaścioł čujna prysłuchoŭvajecca da śvietu. I ličyć siabie dosyć kansalidavanym, kab nie bajacca reakcyi ŭładaŭ kštałtu toj, jakaja napatkała Sajuz palakaŭ ci mienšyja pratestanckija cerkvy.

Usio šyrejšyja słai patrabujuć demakratyčnych reformaŭ i hramadzianskich svabodaŭ. Na sustrečy z Benedyktam prahučała niedvuchsensoŭnaje pasłańnie Kaściołu, i ŭładam Biełarusi varta nad im zadumacca.

• 0
• 0
• 0
• 0
• 0
• 0
• 0
• 0