Udzielnica «Tancaŭ na TNT», jakaja vykanała numar na piłonie ŭ vyšyvancy: Ja biez hetaj pałki žyć nie mahu!
Za adnyja sutki na instahram minčanki Kaciaryny Pahrabickaj padpisałasia bolš ludziej, čym za ŭvieś čas isnavańnia staronki.
Usim chaciełasia vykazać svajo mierkavańnie nakont numara Kaciaryny na šou «Tancy na TNT». Dziaŭčyna vystupiła ŭ biełaruskaj vyšyvancy pad pieśniu Paliny Respubliki «Jak ty».
«Ja nie čakała, što moj vystup vykliča takuju reakcyju. Vielmi šmat ludziej dziakavali i za vybar pieśni, i za numar. Praŭda, byli i tyja, chto pisaŭ, što ja abražaju vyšyvanku tym, što tancuju ŭ joj «stryptyz na šaście».
Ciapier Kaciarynie Pahrabickaj 23 hady, siem ź ich dziaŭčyna zajmajecca tancami na piłonie. Kacia pryvykła da nieadnaznačnaj reakcyi na toje, čym jana zajmajecca, i nie źviartaje na heta ŭvahi. Tym bolš što rodnyja jaje padtrymlivajuć.
«Babula, kali pieršy raz trapiła na moj vystup, płakała ad zamiłavańnia i taho, jak heta pryhoža. Ideju z vystupam na telebačańni padtrymała i jana, i maje baćki, i moj muž».
Kali ŭbačyła, što napisała Palina Respublika, nie mahła ŭziać telefon u ruki
Vystupać na roznych spabornictvach dla Kaci nie ŭ navinku. Za plačyma navat vystup za zbornuju Biełarusi pa aerobicy. Paśla byli šmatlikija, u tym liku i mižnarodnyja, vystupy ŭ tancach na piłonie.
«Pra «Tancy na TNT» ja maryła daŭno. I tut daviedałasia, što ŭ nas u Minsku budzie prachodzić kastynh. Ja vielmi pieražyvała, što ŭ mianie ničoha nie atrymajecca. Daviałosia pierarabić numar, bo całkam jon zajmaje try z pałovaj chviliny, a dla vystupu na «TNT» jaho treba było skaracić udvaja».
Spačatku źjaviłasia muzyka.
«Pieśniu Paliny Respubliki pryniesła mnie niejak maja vučanica. Ja jaje pasłuchała, i ŭ mianie pa skury pabiehli murašy. Dla mianie heta pieśnia pra toje, što svaju radzimu my zaŭsiody nosim u svaim sercy. Numar naradziŭsia sam saboj. A paśla ŭžo ŭźnikła ideja dapoŭnić vobraz vyšyvankaj».
Kaciaryna pryznajecca, što z vystupam u vyšyvancy byli svaje ciažkaści.
«U adzieńni na piłonie naohuł vystupać niazručna — saślizhvaješ. Na piłonie zručniej za ŭsio tancavać u šortach i topie. Tamu dla hetaha numaru daviałosia vybirać elemienty i truki, jakija b pryhoža i efiektna hladzielisia ŭ vopratcy».
Paśla taho, jak vystup pakazali pa telebačańni, na telefon Kaci pryjšło apaviaščeńnie, što Palina Respublika pakinuła kamientar.
«U mianie serca zatachkała chutka-chutka, ale kali ja ŭbačyła, što jana mianie pachvaliła, padziakavała za vybar pieśni, vydychnuła z palohkaj».
Ja biez hetaj pałki žyć nie mahu!
Dalej Kaciarynu čakaje druhi etap adboru.
«Kab ža tolki heta! Ja ciapier rychtujusia da mižnarodnych spabornictvaŭ, dzie chaču pakazać numar u vyšyvancy całkam. Padrychtoŭka zajmaje vielmi šmat času, bo ja amal 1,5 hoda naohuł nie zajmałasia tancami».
U hety pierapynak Kacia paśpieła vyjści zamuž i adkryć ułasnuju studyju tancaŭ.
«Paśla taho, jak ja zaviazała z aerobikaj, doŭhi čas nie mahła prydumać, čym mnie zajmacca. Pachadziła niejki pieryjad na sučasnyja tancy. A paśla niejak vypadkova ŭbačyła vystup na piłonie. Vyrašyła pasprabavać. I zrazumieła, što biez hetaj pałki ja žyć nie mahu!»
Deviz studyi Kaciaryny: «Imknisia da vyšyni».
«Nasamreč, ja prosta chacieła zrabić utulnaje miesca, dzie maje vučanicy buduć siabie adčuvać jak doma. Paśla studyj, što jak spartovyja zały, u nas tut sapraŭdy ŭtulna».
Zajmacca na piłonie prychodziać dziaŭčaty i žančyny ad 16 i amal da 40 hadoŭ. Chacia jość i dziciačyja hrupy: dziaŭčynki ad piaci hod prychodziać na raściažku.
«Pieršy zaniatak vyrašalny, ad jaho zaležyć, ci budzieš ty zajmacca tancami na piłonie. Bo heta baluča. Vielmi. U tych miescach, dzie šost datykajecca da cieła, źjaŭlajucca siniaki, drapiny, paciortaści. Mnohija nie vytrymlivajuć. A heta treba prosta pieraciarpieć. I tady budzieš lotać vyšej i vyšej».
«Takaja jak ty — nie dla mianie»
Tak dumaŭ muž Kaciaryny, kali ŭpieršyniu pabačyŭ jaje fotazdymki na piłonie.
Kaciaryna vyjšła zamuž za svajho adnakurśnika, ź jakim vučyłasia na śpiecyjalnaści palitołah-juryst.
«Pierad tym, jak zaprasić mianie na kubak kavy, muž zajšoŭ da mianie na staronku ŭ sacyjalnych sietkach i spužaŭsia… Spužaŭsia, bo jamu padałosia, što dziaŭčyna, jakaja zajmajecca tancami na piłonie, niejkaja zavobłačnaja i nikoli nie źviernie ŭvahu na jaho. A bajaŭsia darma. Mnie vielmi pašancavała z mužam, bo, kali ja jamu kažu, što chacieła b paŭdzielničać u niejkich spabornictvach, muž adkazvaje: «Čamu ty jašče nie źbiraješ čamadan?»
Kvatera Kaciaryny — heta, badaj, adzinaje miesca, dzie niama piłona.
«Ja pravodžu ŭ studyi pa 10-12 hadzin štodzień. I doma ja chaču pryjści, sieści na kanapu i nie dumać ni pra što».
Apytanka
Ciapier čytajuć
«Dyk dadomu zabiary ałkaša abascanaha i vychodžvaj». Małady zahadčyk adździaleńnia balnicy nie strymlivaje siabie ŭ vyrazach u sacsietkach24
Kamientary