Jak TikTok dapamoh žycharcy Baranavičaŭ ubačyć prapradzieda, jakoha jana nikoli nie bačyła
Hartajučy stužku rekamiendacyj papularnaj sacyjalnaj sietki, haradžanka vypadkova natrapiła na adzin trendavy rolik z fatahrafijaj ludziej, imiony i proźviščy jakich praktyčna całkam supadali ź imionami jaje prodkaŭ.
Jana stała «kapać» i vyśvietliła, što heta nie prosta supadzieńnie. Historyjaj svajoj siamji haradžanka Taćciana cikaviłasia ź dziacinstva. Ale, kaža jana, nikoli nie dumała, što papoŭnić viedy ŭ halinie siamiejnaj hienieałohii joj dapamoža TikTok, piša Intex-press.
— Tam jość akaŭnt, u jakim vykładvajucca roznyja videa na histaryčnuju tematyku. Ale ja nie była na jaho padpisanaja. Prosta adzin ź jaho rolikaŭ trapiŭ u trendy TikTok, tak ja na jaho i natrapiła, — raspaviadaje Taćciana. U hetym videa vykarystoŭvałasia staroje čorna-biełaje fota z ukazańniem imionaŭ i proźviščaŭ mužčyn na im. Hetyja imiony i proźviščy zdalisia Taćcianie vielmi znajomymi: — Majho pradzieda zvali Adam Majsiuk, a prapradzieda — Lavon Kułaj. Fota ž z rolika było padpisana: Adam MaJasiuk i Lavon Kułak. Viadoma, heta mahło być prosta supadzieńnie, ale ja ŭsio ž vyrašyła daviedacca ŭ aŭtara rolika, dzie jon uziaŭ fatahrafiju, kab usio pravieryć, — kaža Taćciana.
Na paviedamleńnie haradžanki ciktokier adkazaŭ, što fota jon znajšoŭ u knizie «Biełarusy ŭ fotazdymkach Isaka Sierbava 1911-1912». Taćciana biez prablem adšukała heta vydańnie ŭ internecie. Akazałasia, što mužčyny na fota sapraŭdy jaje svajaki.
— Niahledziačy na toje, što proźviščy byli paznačany nie zusim pravilna, usie astatnija danyja supali: maje dziadula i pradzied žyli ŭ vioscy Chatyničy Hancavickaha rajona (u knizie heta pakazana), a proźvišča Majsiuk i zusim było adzinym u vioscy, bo moj pradzied byŭ niemiascovym, — raspaviała Taćciana.
Ab svajoj znachodcy haradžanka ŭžo raskazała ŭsim svaim svajakam.
— Usie vielmi ŭzradavalisia, bo fotazdymkaŭ pradziaduli ŭ maładości ŭ nas nie zachavałasia, a prapradzieda i zusim nichto nikoli nie bačyŭ. A ciapier dziakujučy internetu i TikTok my viedajem choć by, jak jon vyhladaŭ, — reziumuje haradžanka.
Kamientary