U bajach pad Bachmutam va Ukrainie zahinuŭ uradženiec Biełarusi Alaksiej Ciškievič, jaki vajavaŭ u składzie PVK «Vahnier». Na hetym tydni baćka pachavaŭ jaho. Karespandenty telekanała «Biełsat» vyśvietlili padrabiaznaści.
Pra hibiel va Ukrainie biełarusa, jaki vajavaŭ u PVK «Vahnier», «Biełsatu» stała viadoma z ułasnych krynic. Im akazaŭsia 30-hadovy Alaksiej Ciškievič z haradskoha pasiołka Brahin u Homielskaj vobłaści.
Pa pieršapačatkovaj infarmacyi, biełarus byccam by zahinuŭ 1 studzienia padčas udaru USU pa miescy dysłakacyi mabilizavanych u rasijskaje vojska ŭ Makiejeŭcy.
Adnak z krynic, blizkich da siamji, žurnalistam udałosia vyśvietlić, što Ciškievič zahinuŭ jašče 26 listapada 2022 hoda ŭ bajach pad Bachmutam. Pryčynaj hibieli stała strelana-askiepkavaje ranieńnie. «Vierahodna, zahinuŭ ad traplańnia rakiety», — vykazałasia adna z krynic u razmovie z karespandentami.
Pra hibiel mužčyny jaho svajakam paviedamili tolki 3 studzienia. Baćka Alaksieja jeździŭ samastojna ŭ Varoniež, kab zabrać cynkavuju trunu ź ciełam zahinułaha. 8 studzienia niabožčyka pachavali ŭ vioscy Vuhły Brahinskaha rajona, na radzimie jahonaj babuli.
Pavodle krynic telekanała, trunu siamja nie adkryvała i cieła nichto z rodnych i blizkich nie apaznavaŭ, bo z momantu hibieli «prajšło šmat času». U Varoniežy baćka zahinułaha atrymaŭ daviedku ab śmierci, u jakoj apisanyja jaje pryčyny i miesca.
Adnak niama dakładnaj infarmacyi, jakim čynam Alaksiej Ciškievič apynuŭsia ŭ padraździaleńniach PVK pad Bachmutam. Pa niepaćvierdžanaj infarmacyi, jon patrapiŭ u najomniki z kałonii, dzie pavinien byŭ adbyvać 15 hadoŭ źniavoleńnia pavodle «narkatyčnaha» artykuła.
Viadoma taksama, što Ciškievič dvojčy byŭ sudzimy ŭ Biełarusi za kvaternyja kradziažy. Pieršy termin atrymaŭ adrazu paśla zakančeńnia škoły, u 2008 hodzie, druhi — u 2010-m.
Na fotazdymku, jaki jon raźmiaściŭ u 2019 hodzie ŭ sacyjalnych sietkach, bačnaja tatuiroŭka ŭ rajonie serca z vyjavaj tak zvanaj «zorki Rusi». Takuju vyjavu jašče nazyvajuć «kvadrat Svaroha» — heta svastykapadobny znak, jakim u Rasii siabie paznačajuć amatary jazyčnictva i ŭdzielniki nacyjanalistyčnaha ruchu «Paŭnočnaje braterstva». Adnak inšych paćviardžeńniaŭ pra mahčymuju suviaź z rasijskimi nacyjanalistami nie znojdziena.
Na jašče adnoj fatahrafii Ciškievič paziruje z čyrvona-zialonaj stužkaj.
Karespandenty «Biełsata», vydaŭšy siabie za siabroŭ siamji zahinułaha, taksama pasprabavali vyśvietlić u pradstaŭnika Ministerstva abarony Biełarusi, ci mahčyma siamji atrymać hrašovuju kampiensacyju ci dapamohu. Pradstaŭnik Minabarony adznačyŭ, što «ŭsia hetaja historyja nie maje dačynieńnia da Ministerstva abarony Biełarusi», ale paraiŭ źviartacca niepasredna ŭ PVK «Vahnier», padkreśliŭšy, što daje paradu jak pryvatnaja asoba.
Na adnym z sajtaŭ, jaki adnosiać da sietki miedyja PVK «Vahnier», adkryta paznačana, što kantrakty na ŭdzieł u vajnie suprać Ukrainy zaklučajucca nie tolki z hramadzianami Rasii, ale i inšych postsavieckich krain. Pry hetym u Biełarusi praduhledžanaja kryminalnaja adkaznaść za ŭdzieł hramadzian Respubliki Biełaruś va ŭzbrojenych farmavańniach inšych krain.
Ci zdaść Tramp Ukrainu Rasii? Čamu demakraty razhromlenyja? Da čaho pryviadzie kantrol respublikancaŭ nad vykanaŭčaj i zakanadaŭčaj uładaj adnačasova?8282
Kamientary