Siońnia — finał Jeŭrabačańnia: voś top-10 piesień, jakija mohuć pieramahčy

Finlandyja. Käärijä

Za što my lubim Jeŭrabačańnie (akramia frykaŭ i skandałaŭ, viadoma)? Za jarkija kolery i viasiołyja, niebanalnyja vystupy, kaniešnie ž! I fin Käärijä u vytančanym nieonava-zialonym puchaviku nieapisalnaj formy vydatna demanstruje, jak heta pracuje (a jašče na im skuranyja štany ź vielizarnymi šypami, tak, my nie žartujem).

Na finskim adbory Käärijä vystupaŭ na samarobnym rynhu z draŭlanych paddonaŭ i ŭ supravadžeńni čatyroch vykanaŭcaŭ balnych tancaŭ u ružovym (niezdarma ž pieśnia nazyvajecca Cha Cha Cha). Tancory skakali jak apošni raz u žyćci, a bližej da kanca śpiavak ich prosta asiadłaŭ — pahladzim, čym heta skončycca ŭ Livierpuli.

Francyja. La Zarra

Numar śpiavački La Zarra pačynajecca nu maksimalna tradycyjna: elehantnaja francužanka ŭ doŭhaj čornaj sukiency staić adna na scenie i manierna śpiavaje roŭna ŭ tym ža styli, jaki raniej pryvodziŭ artystaŭ na apošnija miescy Jeŭrabačańnia. Dumajecie, prachadny numar? Nie śpiašajciesia sudzić, bo Évidemment ad francužanki jašče padniasie siurpryzy!

Jarkaja pieśnia, niezabyŭny vobraz, niezvyčajnyja ruchi i, kaniešnie, mocny hołas — ci chopić hetaha La Zarra, kab skaryć Jeŭrabačańnie? Joj dakładna budzie ciažka supierničać, naprykład, ź finam, ale pakul z hetaj pieśniaj «Jasna» (tak pierakładajecca z francuzskaj Évidemment) zusim nie ŭsio zrazumieła.

Šviecyja. Loreen

Znakamitaja Loreen iznoŭ z nami! I zdolnaja znoŭ uziać na Jeŭrabačańni pieršaje miesca, jak u 2012 hodzie ź pieśniaj Euphoria. Kali vy paraŭnajecie jaje sioletni vystup z trekam Tattoo i pieramožnuju dla Loreen «Ejfaryju» adzinaccacihadovaj daŭnaści, znojdziecca šmat padabienstva: śpiavačka znoŭ adna tancuje na napaŭzaciemnienaj scenie, robić zahadkavyja ruchi rukami ŭ vobłakach biełaha dymu i čas ad času prymaje pozy, padobnyja da johi, dy i sam trek padobny da hučańnia na Euphoria.

Ale ž jon usio roŭna čaplaje, jak i stylistyka Loreen, pa jakoj šmat chto ź jeŭrahledačoŭ, napeŭna, sumavaŭ. Tak što šviedka musić zaniać na konkursie niebłahoje miesca — kaniešnie, kali hledačoŭ nie spužajuć jaje niečakana doŭhija paznohci.

Charvatyja. Let 3

Voś jany, hałoŭnyja fryki sioletniaha Jeŭrabačańnia! Hurt Let 3 pradstaŭlaje pieśniu Mama ŠČ, jakuju ličać satyraj na Pucina i Łukašenku. Muzyki vystupajuć u psieŭdavajskovych ubrańniach, u salista jano navat ružovaje, a sama pieśnia spačatku nahadvaje absurdny nabor słovaŭ: «Mama nabyła traktar, trajna-nina, Armahiedon-babka…». Ale paźniej u tekst uryvajecca bolš zrazumiełaje «Mama, ja budu hrać, mama, ja idu na vajnu, hety maleńki psichapat…». 

Tym časam u rukach adnaho z muzykaŭ źjaŭlajucca rakiety, jakija nasamreč stralajuć piratechnikaj. 

Ukraina. Tvorchi

Vystup hurta Tvorchi z trekam Heart of Steel u nacadbory vyhladaje prościeńkim. Niama tut žvavych bitaŭ i hareznaj padtancoŭki, kolery numaru davoli łakaničnyja. Ale ž kampazicyja kačaje, dy jašče jeŭrapiejcy, napeŭna, adsypluć Ukrainie bahata svaich hałasoŭ na znak padtrymki vajujučaj krainy.

Vyhladaje, što dla ŭkraincaŭ Heart of Steel — simvaličny trek. Heta pieśnia, što pieramahła na adbory ŭ kijeŭskim mietro, dy i słovy tam šmat značać. Niezdarma ž jaje nazva pierakładajecca jak «Stalovaje serca» — toje, što zaraz u hrudziach u kožnaha ŭkrainca.

Italija. Marco Mengoni

Hetuju krainu my ŭklučyli ŭ naš top śpiecyjalna dla tych, chto lubić prostyja dobryja pieśni bieź śpiecefiektaŭ, strakatych kaściumaŭ i žachavitych masak. Marka Mienhoni, udzielnik Jeŭrabačańnia-2013, viartajecca na konkurs z kampazicyjaj Due Vite («Dva žyćcia»), i heta — pieśnia pra kachańnie, jakaja moža raźbić vam serca.

Marka śpiavaje pra ŭnutranaje i źniešniaje žyćcio čałavieka, pra toje, jak heta — być razam z kachanym adzinymi ludźmi ŭ Suśviecie, jakija nie śpiać i adčuvajuć hety śviet u jaho paŭnacie. I pra žyćcio, jakoje pieraacenić usie honki i aplavuchi, jakija ciapier zdajucca važnymi. Duža, duža pryhoža.

Čechija. Vesna

Hurt Vesna i ich trek My Sister's Crown abiacajuć stać ledźvie nie najbolš samabytnaj źjavaj Jeŭrabačańnia ŭ Livierpuli. Dziaŭčaty śpiavajuć fołk z sučasnymi notkami i navat z repam pa-češsku, a ich stylovyja kaściumy — sucelnaje zamiłavańnie. Ale ž nie adnym českim repam: u konkursnaj pieśni taksama hučyć anhlijskaja, bałharskaja i ŭkrainskaja movy.

Nie abyšłosia i biez tradycyjnaha dla konkursu palityčnaha skandału. Nie ŭsim słuchačam zrazumieła, što ž mieli aŭtary pieśni na ŭvazie, kali nazvali pieśniu «Karona majoj siastry». Vidać, heta adsyłka da adnaho z «siastrynskich» słavianskich narodaŭ, čyju karonu ŭ prypievie prosiać nie zdymać, ale da jakoha? Ruskaha ci ŭkrainskaha?

Izrail. Noa Kirel

Kali šviedka Loreen śpiavaje, ležačy na padłozie, to pryhažunia Noa Kireł ź Izraila pierabrałasia na stol, dy jašče i padciahnuła tudy svaich muzykaŭ. Nie čakajcie ad pieśni, jakuju Noa pryviezła ŭ Livierpul, vialikich sensaŭ. Nasamreč Unicorn — heta jarkaja pop-kampazicyja z pryhožaj vykanaŭcaj u adkrytych uborach. 

Tak, prosta i časam stereatypna. Ale na Jeŭrabačańni musiać być pieśni, što idealna padychodziać da tancaŭ u bary ŭviečary suboty, jakraz kali idzie finał konkursa. Niama sumnievaŭ, što Noa Kireł u hety finał trapić.

Šviejcaryja. Remo Forrer

Jašče adzin prykład prosta dobraj i pryhožaj pieśni, paśla jakoj nie dumaješ, maŭlaŭ, navošta ŭ mianie adabrali try chviliny žyćcia. Rema Farer sa Šviejcaryi prezientuje antyvajenny trek Watergun, vielmi emacyjny i aktualny ŭ našyja časy. Rema śpiavaje pra dziciačyja hulni ŭ vajnušku, jakija raptam pieratvarylisia dla Jeŭropy ŭ sumnuju realnaść. «My staim na linii frontu, kudy my idziem?» — zapytvaje chłopiec.

Ispanija. Blanca Paloma

Etničnyja matyvy ad Ispanii na Jeŭrabačańni? Tak, byvaje i heta! U svaim vystupie ź pieśniaj JEAJEA (ci isnuje premija za samuju zahadkavuju nazvu treka?) Błanka Pałoma kambinuje matyvy i ruchi fłamienka z adsyłkami da sučasnaści, a časam uvohule pieratvaraje svaju pieśniu ŭ maleńnie. A pahladzicie, jakija pryhožyja ŭ hetaj pieśni słovy: «Majo dzicia, kali ja pamru, niachaj pachavajuć jany mianie na Miesiacy, i ja budu hladzieć na ciabie kožnuju noč».

Tak, muzyka Pałomy moža być składanaj dla razumieńnia, i heta nie kłasična-papsovy farmat Jeŭrabačańnia. Ale budzie duža sumna, kali hetaja artystka i jaje vystup ź inšaj płaniety nie atrymajuć pryznańnia.

«Jeŭrabačańnie-2023» projdzie ŭ Vialikabrytanii

Biełarusy zmohuć prahałasavać na «Jeŭrabačańni-2023» razam z usim śvietam

Ukrainu budzie pradstaŭlać na «Jeŭrabačańni» hrupa Tvorchi sa śpievakom ź Nihieryi. Adbor prajšoŭ u kijeŭskim mietro

• 54
• 0
• 4
• 9
• 4
• 7
• 18
• 0