Čym viadomy namieśnik ministra adukacyi, jaki daŭ ašałamlalny adkaz pra «familiju» ŭ atestatach
Imia Alaksandra Kadłubaja staić u liście, jakim Ministerstva adukacyi instruktuje kiraŭnikoŭ škoł, jak tłumačyć vučniam i baćkam «techničnuju pamyłku» ŭ novych błankach atestataŭ i dypłomaŭ.
U hetych błankach zamiest «proźvišča» napisali «familija».
«V sootvietstvii s Tłumačalnym słoŭnikam biełaruskaj movy (Minsk, «Biełorusskaja encikłopiedija» imieni P. Brovki, 1999) vozmožno ispolzovanije v biełorusskom jazykie słova «familija», — tłumačyłasia ŭ liście Ministerstva adukacyi. Choć słova «familija» pa-biełarusku maje zusim inšaje značeńnie — rod, svajaki. U adkazie Ministerstva adukacyi, napisanym pa-rusku, było zroblena niamała i zvyčajnych pamyłak. Tak, słova «raziaśnienije» ŭ im było napisana bieź ćviordaha znaka.
41-hadovy Alaksandr Kadłubaj nie maje fiłałahičnaj adukacyi. Jon nastaŭnik historyi. Skončyŭ Biełaruski dziaržaŭny ŭniviersitet. Za plačyma taksama vučoba ŭ Akademii kiravańnia pry Łukašenku.
Kadłubaj naradziŭsia na Hrodzienščynie, u vioscy Varonča Karelickaha rajona.
Što jašče pra jaho viedaje internet i raskazvajuć ludzi?
Ën chadziŭ u biełaruskamoŭnuju škołu.
Jahony baćka Uładzimir byŭ dyrektaram prafiesijna-techničnaha vučylišča ŭ miastečku Mir.
Chacieŭ pastupać u Akademiju milicyi, ale padviało zdaroŭje.
Užo budučy namieśnikam ministra, zaklikaŭ školnikaŭ u 2022 hodzie dałučacca da Tydnia rodnaj movy.
«Na majo mierkavańnie, takija mierapryjemstvy vielmi dobra ŭpišucca ŭ moładzievaje asiarodździe i ŭ pieršuju čarhu pavialičać cikavaść moładzi da rodnaj movy, da jaje ŭžyvańnia. I pašyrać asiarodździe tych, chto vykarystoŭvaje ŭ svaim žyćci rodnuju movu», — kazaŭ jon.
Namieśnikam ministra adukacyi Alaksandra Kadłubaja pryznačyli ŭ 37 hadoŭ. Uźlot jaho karjery z kiraŭnika ŭpraŭleńnia adukacyi Lidskaha rajvykankama da ministerskaj pasady vyhladaŭ u 2019 hodzie niečakanym. Varta adznačyć, što heta byŭ pieryjad ministarstva Ihara Karpienki, obier-kamunista, jaki paśla zamienić Lidziju Jarmošynu na pasadzie kiraŭnika Centrvybarkama.
Za čas pracy ŭ ministerstvie Alaksandru Kadłubaju nie raz davodziłasia apraŭdvać chiby i niepapularnyja zachady Ministerstva adukacyi.
U 2019 hodzie Kadłubaj, naprykład, apraŭdvaŭ rašeńnie ab zabaronie mabilnych telefonaŭ u škole.
Jon nastojvaŭ, što niedapuščalna, kab vučni zdymali na mabilnyja telefony piedahohaŭ u kampramietujučych abstavinach i vykarystoŭvali zdymki dla ckavańnia nastaŭnikaŭ.
Pa słovach Kadłubaja, izalavać vučniaŭ ad telefonaŭ niapravilna, ale nastaŭniki abaviazanyja kantralavać ich vykarystańnie školnikami. Čynoŭnik prapanoŭvaŭ zachoŭvać telefony ŭ śpiecyjalnych pranumaravanych jačejkach, jakija znachodziacca na stale nastaŭnika.
U 2022 hodzie Alaksandru Kadłubaju vypała kamientavać infarmacyju ab zakryćci licejaŭ, jakaja vyklikała abureńnie baćkoŭ. U Minsku dva licei akazalisia pad pahrozaj likvidavańnia.
Čynoŭnik zapeŭnivaŭ tady, što likvidoŭvać licei nie źbirajucca i jany zastajucca ŭ Kodeksie ab adukacyi.
Pa jaho słovach, viedamstva tolki prapanavała miascovym orhanam ułady ŭparadkavać rabotu licejaŭ.
«My daviedalisia, što ŭ niekatoryja ŭstanovy zaličvali navučencaŭ, jakija atrymali zusim nizkija bały na ŭstupnych ekzamienach. Jość licei, kudy mohuć trapić tolki haradskija dzieci, bo tam niama svajho internata. Bolš za toje, licei arandujuć pamiaškańni ŭ škoł, a niekatoryja nastaŭniki pracujuć paralelna i ŭ licei, i ŭ škole», — tłumačyŭ jon.
Padčas pratestaŭ 2020 hoda z patrabavańniem sumlennaha padliku hałasoŭ i adnaŭleńnia zakonnaści ŭ krainie Alaksandr Kadłubaj nastojvaŭ na ŭviadzieńni žorstkaha pakarańnia dla baćkoŭ, jakija dapuścili ŭdzieł dziaciej u «niesankcyjanavanych masavych mierapryjemstvach».
«My časta bačym na kadrach, jak dzieci płačuć, trymajučy za ruku baćkoŭ, bo traplajuć u situacyju rezkich krykaŭ, supraćstajańnia dy inšych niehatyŭnych maralnych aśpiektaŭ», — aburaŭsia jon.
Kadłubaj adstojvaŭ i źjaŭleńnie ŭ škołach kiraŭnikoŭ pa vajskova-patryjatyčnym vychavańni. Pry hetym zvyčajna na hetyja pasady pryznačali adstaŭnych vajskoŭcaŭ z prarasijskimi pohladami.
«Hetyja ludzi pavinny być maksimalna efiektyŭna ŭbudavanyja ŭ sistemu vychavaŭčaj pracy ŭstanovy», — nastaŭlaŭ padnačalenych čynoŭnik.
Alaksandr Kadłubaj svoj pracoŭny šlach pačaŭ u 2004 hodzie. Pa zakančeńni ŭniviersiteta jaho raźmierkavali ŭ Lidu nastaŭnikam historyi ŭ siaredniuju škołu № 8.
U 2008-m 25-hadovaha Kadłubaja pryznačyli dyrektaram Mažejkaŭskaj siaredniaj škoły Lidskaha rajona.
Za dyrektarstvam Kadłubaja ŭ škole pravasłaŭny śviatar pravodziŭ dla vučniaŭ zaniatki pa rukapašnym bai.
U 2012 hodzie Alaksandr Kadłubaj stanovicca kiraŭnikom upraŭleńnia adukacyi Lidskaha rajvykankama. Pry im rajonnaja sistema adukacyi nie raz pryznavałasia adnoj z najlepšych u vobłaści.
U toj čas usie školnyja stałoŭki rajona byli abstalavanyja kamierami videanazirańnia, kab rabotniki nie krali praduktaŭ.
«U charčabłokach usich ustanoŭ ahulnaj siaredniaj adukacyi rajona ŭstanoŭleny videakamiery, u niekatorych navat pa niekalki štuk — u zaležnaści ad pažadańnia kiraŭnika, — kazaŭ Kadłubaj. — Infarmacyja z kamier zapisvajecca na siervier i zachoŭvajecca ŭ škole na praciahu 30 kalandarnych dzion».
Jašče adnoj mieraj suprać kradziažoŭ stali pravierki asabistych rečaŭ rabotnikaŭ pa skančeńni pracoŭnaha dnia.
«Naša Niva» — bastyjon biełaruščyny
PADTRYMAĆHladzicie taksama:
Jak skazać pa-biełarusku «piataja točka»?
«Uziali staryja tablicy CT». Jak pieraličyli bały na CE, choć heta i zabaroniena zakanadaŭstvam
«Moj kachany nie čytaje naviny, kali jany napisanyja pa-biełarusku». Darja Caryk stała na abaronu ruskaj movy i pryplała navat Paźniaka48
Kamientary
I čto płochoho v tom, čto malčiški i dievčienki budut izučať NVP. Eto namnoho łučšie i poleźnieje, čiem NIE izučať NVP.
Kak słožno byť hienierałom v stranie, hdie nachodiťsia čužaja armija, znajut tolko hienierały etoj strany i inyje dumajuŝije.