Чым вядомы намеснік міністра адукацыі, які даў ашаламляльны адказ пра «фамілію» ў атэстатах

У гэтых бланках замест «прозвішча» напісалі «фамілія».

«В соответствии с Тлумачальным слоўнікам беларускай мовы (Минск, «Белорусская энциклопедия» имени П. Бровки, 1999) возможно использование в белорусском языке слова «фамілія», — тлумачылася ў лісце Міністэрства адукацыі. Хоць слова «фамілія» па-беларуску мае зусім іншае значэнне — род, сваякі. У адказе Міністэрства адукацыі, напісаным па-руску, было зроблена нямала і звычайных памылак. Так, слова «разяснение» ў ім было напісана без цвёрдага знака.

41-гадовы Аляксандр Кадлубай не мае філалагічнай адукацыі. Ён настаўнік гісторыі. Скончыў Беларускі дзяржаўны ўніверсітэт. За плячыма таксама вучоба ў Акадэміі кіравання пры Лукашэнку.

Кадлубай нарадзіўся на Гродзеншчыне, у вёсцы Варонча Карэліцкага раёна.

Што яшчэ пра яго ведае інтэрнэт і расказваюць людзі?

Ëн хадзіў у беларускамоўную школу. 

Ягоны бацька Уладзімір быў дырэктарам прафесійна-тэхнічнага вучылішча ў мястэчку Мір.

Хацеў паступаць у Акадэмію міліцыі, але падвяло здароўе.

Ужо будучы намеснікам міністра, заклікаў школьнікаў у 2022 годзе далучацца да Тыдня роднай мовы.

«На маё меркаванне, такія мерапрыемствы вельмі добра ўпішуцца ў моладзевае асяроддзе і ў першую чаргу павялічаць цікавасць моладзі да роднай мовы, да яе ўжывання. І пашыраць асяроддзе тых, хто выкарыстоўвае ў сваім жыцці родную мову», — казаў ён.

Павялічыць

Намеснікам міністра адукацыі Аляксандра Кадлубая прызначылі ў 37 гадоў. Узлёт яго кар’еры з кіраўніка ўпраўлення адукацыі Лідскага райвыканкама да міністэрскай пасады выглядаў у 2019 годзе нечаканым. Варта адзначыць, што гэта быў перыяд міністарства Ігара Карпенкі, обер-камуніста, які пасля заменіць Лідзію Ярмошыну на пасадзе кіраўніка Цэнтрвыбаркама.

За час працы ў міністэрстве Аляксандру Кадлубаю не раз даводзілася апраўдваць хібы і непапулярныя захады Міністэрства адукацыі.

У 2019 годзе Кадлубай, напрыклад, апраўдваў рашэнне аб забароне мабільных тэлефонаў у школе.

Ён настойваў, што недапушчальна, каб вучні здымалі на мабільныя тэлефоны педагогаў у кампраметуючых абставінах і выкарыстоўвалі здымкі для цкавання настаўнікаў.

Па словах Кадлубая, ізаляваць вучняў ад тэлефонаў няправільна, але настаўнікі абавязаныя кантраляваць іх выкарыстанне школьнікамі. Чыноўнік прапаноўваў захоўваць тэлефоны ў спецыяльных пранумараваных ячэйках, якія знаходзяцца на стале настаўніка.

У 2022 годзе Аляксандру Кадлубаю выпала каментаваць інфармацыю аб закрыцці ліцэяў, якая выклікала абурэнне бацькоў. У Мінску два ліцэі аказаліся пад пагрозай ліквідавання.

Чыноўнік запэўніваў тады, што ліквідоўваць ліцэі не збіраюцца і яны застаюцца ў Кодэксе аб адукацыі.

Па яго словах, ведамства толькі прапанавала мясцовым органам улады ўпарадкаваць работу ліцэяў.

«Мы даведаліся, што ў некаторыя ўстановы залічвалі навучэнцаў, якія атрымалі зусім нізкія балы на ўступных экзаменах. Ёсць ліцэі, куды могуць трапіць толькі гарадскія дзеці, бо там няма свайго інтэрната. Больш за тое, ліцэі арандуюць памяшканні ў школ, а некаторыя настаўнікі працуюць паралельна і ў ліцэі, і ў школе», — тлумачыў ён.

Павялічыць

Падчас пратэстаў 2020 года з патрабаваннем сумленнага падліку галасоў і аднаўлення законнасці ў краіне Аляксандр Кадлубай настойваў на ўвядзенні жорсткага пакарання для бацькоў, якія дапусцілі ўдзел дзяцей у «несанкцыянаваных масавых мерапрыемствах».

«Мы часта бачым на кадрах, як дзеці плачуць, трымаючы за руку бацькоў, бо трапляюць у сітуацыю рэзкіх крыкаў, супрацьстаяння ды іншых негатыўных маральных аспектаў», — абураўся ён.

Кадлубай адстойваў і з'яўленне ў школах кіраўнікоў па вайскова-патрыятычным выхаванні. Пры гэтым звычайна на гэтыя пасады прызначалі адстаўных вайскоўцаў з прарасійскімі поглядамі.

«Гэтыя людзі павінны быць максімальна эфектыўна ўбудаваныя ў сістэму выхаваўчай працы ўстановы», — настаўляў падначаленых чыноўнік.

Аляксандр Кадлубай свой працоўны шлях пачаў у 2004 годзе. Па заканчэнні ўніверсітэта яго размеркавалі ў Ліду настаўнікам гісторыі ў сярэднюю школу № 8.

У 2008-м 25-гадовага Кадлубая прызначылі дырэктарам Мажэйкаўскай сярэдняй школы Лідскага раёна.

За дырэктарствам Кадлубая ў школе праваслаўны святар праводзіў для вучняў заняткі па рукапашным баі.

У 2012 годзе Аляксандр Кадлубай становіцца кіраўніком упраўлення адукацыі Лідскага райвыканкама. Пры ім раённая сістэма адукацыі не раз прызнавалася адной з найлепшых у вобласці.

У той час усе школьныя сталоўкі раёна былі абсталяваныя камерамі відэаназірання, каб работнікі не кралі прадуктаў.

«У харчаблоках усіх устаноў агульнай сярэдняй адукацыі раёна ўстаноўлены відэакамеры, у некаторых нават па некалькі штук — у залежнасці ад пажадання кіраўніка, — казаў Кадлубай. — Інфармацыя з камер запісваецца на сервер і захоўваецца ў школе на працягу 30 каляндарных дзён».

Яшчэ адной мерай супраць крадзяжоў сталі праверкі асабістых рэчаў работнікаў па сканчэнні працоўнага дня.

Глядзіце таксама:

«Гатова адстаяць і наступную ноч, абы запісацца». У школу ў «Новай Баравой» выстраілася чарга з бацькоў

Сёлета ў школах і гімназіях Мінска адкрыюцца авіяцыйныя класы. Дзе яны будуць і чым адметнае навучанне

Як сказаць па-беларуску «пятая точка»?

«Узялі старыя табліцы ЦТ». Як пералічылі балы на ЦЭ, хоць гэта і забаронена заканадаўствам

• 14
• 8
• 5
• 12
• 37