Patryjatyčny spam

Kolki dzion tamu na pryvatnuju skryniu pryjšoŭ list ź nieviadomaha adrasu, ź vidavočna adrasavanym nia mnie, a ŭsim zapar tekstam. Byŭ by zvyčajny spam, kali b nia dźvie akaličnaści - toje, na jaki adras jon pryjšoŭ (a na hety adras spam prychodzić zaredka), i tekst. Vidavočna, chtości z tych, ź kim ja pierapisvaŭsia, «źliŭ» moj adras spameram, i heta vielmi niepryjemna. A tekst…

Pavažany biełarus!

U hety ciažki čas Radzimie patrebnaja tvaja dapamoha. Niezaležnaść Biełarusi, jaje nacyjanalnyja symbali, biełaruskaja mova, historyja i kultura jość najbolšymi kaštoŭnaściami, jakija razburajucca zaraz i jakija treba baranić. Zaraz, kali faktyčna zabaronienyja apošnija niezaležnyja vydańni, kali źniščajuć Sajuz piśmieńnikaŭ (a jaho biblijateku vykidajuć na vulicu) vielmi važna dla biełarusaŭ trymacca razam, stajać adzin za adnaho, baranicca i pašyrać svoj upłyŭ. Treba pa miery mahčymaściaŭ sadziejničać raspaŭsiudžvańniu biełaruskich knih, biełaruskaj muzyki, spryjać kansalidacyi biełarusaŭ na hruncie nacyjanalnych kaštoŭnaściaŭ dziela pabudovy biełaruskaj demakratyčnaj dziaržavy.

Pobač žyvuć sotni i tysiačy śviadomych biełarusaŭ, jakija padzialajuć našyja pohlady, ale ž my raźjadnanyja! Treba znachodzić adzin adnaho, treba razam rabić ahulnuju spravu.

Kali Vy zacikaŭlenyja ŭ tym, kab atrymać kantaktnuju infarmacyju adnadumcaŭ, jakija žyvuć pobač, adkažycie na hety list – paćvierdzicie svoj namier addana pracavać dziela Baćkaŭščyny.

Žyvie Biełaruś!
http://www.bielarus.net

Voś takoje voś. Kali prajści pa spasyłcy, to pabačym, što brudnymi metadami karystajucca paźniakoŭcy…

Zajšoŭ. Pačytaŭ. Nie mahu nie prakamentavać.

«Biełaruskaja salidarnaść».. Hučnaja nazva. Adrazu bačna, što aŭtary chočuć padpisać pad siabie ŭsich biełarusaŭ, jak było ŭ Polščy ź jejnaj Solidarność. Ale ž kali tak, tady choć by jak chavali svaju sutnaść! Ale ž nie chavajuć. I jak bačna, «BS» taja - prosta novaja nazva KCHP, ź Zianonam Paźniakom, viadoma, na čale.

Kali čytaješ tyja artykuły, što źmieščanyja na tym sajcie, razumieješ, nakolki ŭsio ž taki spadar Paźniak i jahonyja paplečniki daloka ad Biełarusi, biełarusaŭ i ichnych prablem. Nakolki jon, nasamreč, užo daloki ad ułasna palityki, jak zmahańnia za sercy ludziej. Časam uźnikaje adčuvańnie, što jon byccam taki enerhičny pensijaner - irviecca zrabić što-niebudź istotnaje, uvieś čas uzhadvajučy byłoje, tyja časy, kali jon byŭ małady i ŭsio było lohka. Bolšaja častka artykułaŭ tyčycca ŭspaminaŭ pra «załatyja časy», kali Front byŭ sapraŭdy mocnym; časam traplajucca dumki pra toje, jak usio budzie dobra i vydatna ŭ budučyni, kali nacyjanalnaja ideja pieramoža. Ale ž, nažal, pra sučasnaść adekvatnaha mała. Bačna, što Paźniak bolej historyk za palityka… Cikava tolki, ci moža heta źmianicca jašče?

Varty asobnaj zhadki apošni artykuł Siarhieja Navumčyka, jaki navat patrapiŭ u «Našu Nivu». Cytuju: » U paraŭnańni sa Ściaham, z Hierbam, z movaj, ekanomika (jakaja ŭ žyćci hramadztva, kaniečnie, važnaja) nia maje nijakaha značeńnia. Udakładniaju: jana nia prosta mienš istotnaja ci mała istotnaja – jana ŭvohule nia maje značeńnia, kali na kartu prastaŭleny los symbalaŭ i movy.» Adrazu chočacca padkazać aŭtaru, što piramidu Masłoŭ nichto nie admianiaŭ, i samymi važnymi dla čałavieka zastajucca bijalahičnyja patrebnaści - jak «što źjeści», biaśpieka i ŭtulnaść - jak «dzie žyć», a ŭžo potym - usio astatniaje, ułučna z hramadztvam, nacyjaj, symbalami i movaj. I pakul prostyja ludzi bajacca, što kali Paźniak pryjdzie da ŭłady, u ich adbiaruć ich kryvioj zaroblenyja 250 baksaŭ i im nia budzie čaho jeści, ich nijakimi symbalami nie pryciahnieš da salidarnaści. Fakt, što intelihiencyja, jakaja moža zrazumieć, što los nacyi važniejšy za zarobak na zavodzie, zaŭsiody ŭ mienšaści. A astatnija taksama isnujuć, i jany taksama ludzi, i pra ich nia treba zabyvać - a spadary Paźniak i Navumčyk, nažal, zabyvajuć. Heta, siabry, palityka, a nie aśvieta, bo pakul niemahčyma zrabić tak, kab 10 miljonaŭ adrazu zachacieli žyć pad nacyjanalnymi symbalami i mienavita ŭ niezaležnaj dziaržavie. I pakul miljony sapraŭdy hatovyja zhubić niezaležnaść, tolki kab zarobki byli bolej, datul zmahacca treba nie z palitolahami, a z ułasnymi zababonami i inercyjnaściu myśleńnia; bo ludziam treba davodzić nia toje, što z čyrvonym lepiej spałučajecca bieły, čym zialony, a toje, što pry nacyjanalnaj uładzie i ŭ niezaležnaj krainie zarobki ŭ ludziej mohuć i buduć vysokija.

U tym i adroźnieńnie, i pośpiech polskaj Salidarnaści - u tym, što tam rabili spravu rabočyja z elektrykam na čale dla rabočych, i jany razumieli prostych ludziej, i ludzi ich razumieli. A pakul hetaha razumieńnia niama - heta nie «Biełaruskaja salidarnaść», a histaryčny hurtok. Historyja, spadarstva, nie adzinaja dastojnaja navuka. Ekanomika, psychalohija, lohika, palitalohija i jašče šmat jakija nia mienš dastojnyja. Źviarnicie na ich uvahu.

ps: ja nia staŭ adkazvać na toj list. Ja i tak biez hurtka zdolny addana pracavać dziela Baćkaŭščyny. Na žal, zaraz i tak zašmat lepšych ludziej marnujuć svoj čas i vysiłki, robiačy niezrazumiełyja rečy, - naprykład, źbirajučy podpisy za Paźniaka pierad vybarami…

BM, TOL Biełaruś

• 0
• 0
• 0
• 0
• 0
• 0
• 0
• 0