Hajdukievič, Hihin, Špakoŭski, Šaŭcoŭ, Barsukoŭ i astatnija. Chto ŭ Minsku sabraŭsia ŭ deputaty
Stanam na 23 śniežnia ŭ Minsku 45 čałaviek zarehistravali svaje inicyjatyŭnyja hrupy pa zbory podpisaŭ vybarščykaŭ na vyłučeńnie siabie ŭ jakaści kandydataŭ u deputaty Pałaty pradstaŭnikoŭ.
Deputat Aleh Hajdukievič, Dźmitryj Šaŭcoŭ, pad kiraŭnictvam jakoha Biełaruski Čyrvony Kryž udzielničaŭ u vyvazie dziaciej z akupavanych ukrainskich terytoryj u Biełaruś, adzin z hałoŭnych ideołahaŭ režymu Łukašenki Vadzim Hihin, były namieśnik načalnika MUS Alaksandr Barsukoŭ, jaki za pracu padčas pratestaŭ u 2020 hodzie patrapiŭ pad sankcyi ES, adyjozny prapahandyst Alaksandr Špakoŭski, deputat-kamunist Siarhiej Kliševič, jaki pad čyrvona-zialonym ściaham pakazvaŭ fak pratestoŭcam u 2020 hodzie, śpikierka Hienprakuratury Anžalika Kurčak, jakaja zmahajecca z čajłdfry ŭ krainie, — heta adnyja z tych, chto pretenduje na deputactva ad Minska.
Prajekt «Pravaabaroncy za svabodnyja vybary» pahladzieŭ, za vyłučeńnie kaho ŭ kandydaty ŭ deputaty Pałaty pradstaŭnikoŭ buduć źbirać podpisy ŭ Minsku.
Zarehistravaŭ svaju inicyjatyŭnuju hrupu pa zbory podpisaŭ skandalny kiraŭnik Biełaruskaha Čyrvonaha Kryža, eks-deputat Dźmitryj Šaŭcoŭ. Zajmaje hetuju pasadu ź vieraśnia 2021-ha. Jon aktyŭna vystupaŭ i narakaŭ na «niehumannaść Jeŭropy» padčas razharu štučnaha mihracyjnaha kryzisu i zapomniŭsia jašče niekalkimi zajavami — naprykład pra toje, što homaseksualnaść patrabuje lačeńnia.
Paśla pačatku poŭnamaštabnaha ŭvarvańnia Rasii va Ukrainu Čyrvony Kryž pad kiraŭnictvam Šaŭcova zaniaŭsia ŭ tym liku vyvazam «na azdaraŭleńnie» (jak jany heta nazyvajuć) dziaciej z časova akupavanych ukrainskich terytoryj.
Uletku Šaŭcoŭ adkryta paćvierdziŭ, što ŭdzielničaŭ u vyvazie dziaciej z Ukrainy ŭ Biełaruś. Tady Ministerstva zamiežnych spraŭ Ukrainy zaklikała Mižnarodny kryminalny sud vydać ordar na aryšt Šaŭcova.
U deputaty taksama vyrašyŭ pajści viadomy prapahandyst Vadzim Hihin, ciapierašni hiendyrektar Nacyjanalnaj biblijateki. Raniej jon uznačalvaŭ fakultet fiłasofii i sacyjalnych navuk BDU. U źviestkach CVK paznačany jak siabra partyi «Biełaja Ruś». Hihin viadomy svaimi prarasijskimi i antyzachodnimi vykazvańniami. Tak, jon prapanoŭvaŭ «uvieści nulavuju talerantnaść da ŭładalnikaŭ «Karty palaka»». Sioleta ź jahonaj inicyjatyvy vyklučyli sa školnaj prahramy «Kałasy pad siarpom tvaim» Uładzimira Karatkieviča.
Taksama Hihin uvachodzić u skład kamisii pa viartańni palituciekačoŭ. U pieradačy «Azarionok. Napriamuju» ideołah Łukašenki krytykavaŭ kanfierencyju demakratyčnych sił «Novaja Biełaruś», jakaja prajšła 8 i 9 žniŭnia 2022-ha ŭ Vilni. Ën pahražaŭ apanientam režymu za miažoj zabojstvami. Vosieńniu 2022-ha Hihin jeździŭ naziralnikam na «refierendum» u tak zvanuju «Łuhanskuju Narodnuju Respubliku». Jon patrapiŭ u apošni sankcyjny śpis Jeŭrasajuza suprać Biełarusi.
Pavodle źviestak CVK, svaju inicyjatyŭnuju hrupu pa zbory podpisaŭ za svajo vyłučeńnie ŭ deputaty zarehistravaŭ były namieśnik ministra ŭnutranych spraŭ Alaksandr Barsukoŭ, jaki zajmaŭ hetuju pasadu padčas pratestaŭ u 2020 hodzie. Suprać jaho ŭvodzilisia sankcyi Jeŭrasajuza paśla prezidenckich vybaraŭ — jak va ŭžo dalokim 2010-m, hetak i ŭ 2020 hodzie.
U tłumačalnaj častcy havaryłasia, što jon asabista kaardynavaŭ razhony demanstrantaŭ, a taksama ŭdzielničaŭ u represijach suprać apazicyi. Z 2011 da 2017 hoda Barsukoŭ byŭ kiraŭnikom minskaj milicyi, z 2017-ha — namieśnikam ministra ŭnutranych spraŭ. U 2020 hodzie Alaksandr Barsukoŭ asabista naviedvaŭ u izalatary na Akreścina zatrymanych padčas akcyj pratestu i ździekavaŭsia ź ich. Potym milicyjant zajaŭlaŭ, što faktaŭ ździekaŭ nibyta zafiksavana nie było.
U źviestkach CVK paznačana, što jon biespartyjny i pracuje inśpiektaram pa Minsku administracyi Łukašenki. U 2022 hodzie Barsukoŭ uziaŭ na siabie kuratarstva nad novym asobym atradam śpiecyjalnaha pryznačeńnia «Ryś». Asnoŭnymi zadačami novaha atrada zajaŭlalisia «baraćba ź niezakonnymi ŭzbrojenymi farmavańniami i dyviersijnymi vyviedvalnymi hrupami».
Na Śvisłackim učastku № 95 zarehistravaŭ svaju hrupu adzin z hałoŭnych prapahandystaŭ Alaksandra Łukašenki Alaksandr Špakoŭski. Paznačana, što jon źjaŭlajecca siabram novazarehistravanaj partyi «Biełaja Ruś». Miescam jahonaj pracy paznačana «daradca-pasłańnik ambasady Respubliki Biełaruś u Rasijskaj Fiederacyi».
U 2021 hodzie Špakoŭski ŭvachodziŭ u skład kanstytucyjnaj kamisii, jakaja raspracoŭvała papraŭki da Kanstytucyi. Trapiŭ u sankcyjnyja śpisy Ukrainy za padtrymku napadu na jaje. Apošnim časam jon byŭ aktyŭnym udzielnikam rasijskich prapahandysckich šou.
U deputatki vyrašyła pajści taksama načalnica ŭzajemadziejańnia sa srodkami masavaj infarmacyi i redakcyjnaj dziejnaści Hienieralnaj prakuratury Anžalika Kurčak.
Sioleta śpikierka Hienprakuratury ŭ efiry «NTV Biełaruś» abviaściła čajłdfry pahrozaj «nacyjanalnaj biaśpiecy i našaj demahrafičnaj palitycy» dy «prajavaju novaj demakratyi». Jana pachvaliłasia pryznańniem «ekstremisckimi materyjałami» niekalkich telehram-kanałaŭ i akaŭntaŭ u sacsietkach, pryśviečanych čajłdfry.
Svaju inicyjatyŭnuju hrupu zarehistravaŭ taksama Dźmitryj Arychoŭski — namieśnik hienieralnaha dyrektara pa vytvorčaści i ideałahičnaj pracy «Vydaviectva «Biełaruski dom druku». Cikava, što na prezidenckich vybarach u 2020 hodzie jon byŭ staršynioj vybarčaj kamisii na adnym z učastkaŭ u Minsku.
Na deputactva ŭ nižniaj pałacie parłamienta pretenduje taksama staršynia Pastajannaj kamisii pa mižnarodnych spravach i nacyjanalnaj biaśpieki Savieta Respubliki Siarhiej Račkoŭ.
Taksama na novy termin u Pałacie pradstaŭnikoŭ pretenduje deputatka Pałaty pradstaŭnikoŭ Maryna Lančeŭskaja — mienavita jana inicyjavała źmieny ŭ Kryminalny kodeks, jakija ŭviali śmiarotnaje pakarańnie za sprobu terarystyčnaha aktu. Taksama jana źjaŭlałasia adkaznaj za padrychtoŭku zakonaprajekta, jaki praduhledžvaŭ mahčymaść viadzieńnia pa kryminalnych spravach u dačynieńni da pamierłych.
Na novy termin taksama pretendujuć deputaty Vasil Panasiuk i Ivan Hardziejčyk. U deputaty vyrašyŭ pajści pamočnik staršyni Pałaty pradstaŭnikoŭ, siabra sakrataryjata Pałaty Mikałaj Buzin. Viadoma, što jon źjaŭlajecca pałkoŭnikam, doktaram vajennych navuk, byŭ namieśnikam načalnika pa navukovaj pracy Hienieralnaha štaba.
U Pieršamajskim rajonie svaju inicyjatyŭnuju hrupu zarehistravaŭ badaj samy skandalny dziejny deputat i lidar Libieralna-demakratyčnaj partyi Aleh Hajdukievič.
U 2022 hodzie jon u składzie delehacyi siabroŭ ŁDPB naviedaŭ akupavanyja Rasijaj terytoryi Ukrainy nibyta z «humanitarnaj misijaj». Uletku Hajdukievič padčas pasiadžeńnia «štaba patryjatyčnych sił Respubliki Biełaruś» vykazaŭ prapanovu, jak zrabić tak, kab u prezidenty ŭ Biełarusi nie mahli navat tearetyčna bałatavacca ludzi, nie zaćvierdžanyja źvierchu.
Sioleta adbyŭsia sud pa tak zvanaj spravie «ab padpale domu Hajdukieviča». 18 abvinavačanym byli vyniesienyja žorstkija prysudy terminam da 25 hadoŭ turmy.
U deputaty źbirajecca taksama dyrektar Nacyjanalnaha centra zakanadaŭstva i pravavych daśledavańniaŭ Respubliki Biełaruś Vadzim Ipataŭ. Ź lutaha 2010 hoda jon zajmaje pasadu namieśnika staršyni Centrvybarkama — u tym liku pad jaho kiraŭnictvam adbyvajucca vybary ŭ Biełarusi, jakija pryznajucca mižnarodnymi i nacyjanalnymi naziralnikami jak niespraviadlivyja.
Na deputactva taksama pretenduje namieśnik hienieralnaha dyrektara pa ideałahičnaj pracy na Minskim padšypnikavym zavodzie Andrej Hanusievič. Raniej jon zajmaŭ pasadu namieśnika načalnika Minskaha haradskoha ŭpraŭleńnia MNS pa ideałahičnaj rabocie i kadravym zabieśpiačeńni. Źjaŭlajecca pałkoŭnikam unutranaj słužby, biespartyjny.
Što charakterna, svaje inicyjatyŭnyja hrupy zarehistravali i inšyja asoby, jakija majuć dačynieńnie da vajskovaj słužby. Naprykład, načalnik Vajskovaj akademii Hienadź Lapieška, načalnik štaba Ministerstva ŭnutranych spraŭ Ihar Paškoŭ.
Idzie na novy termin i člen Kamunistyčnaj partyi Biełarusi, člen Pastajannaj kamisii pa adukacyi, kultury i navucy Pałaty pradstaŭnikoŭ Siarhiej Kliševič. Heta były pieršy sakratar Minskaha harkama BRSM i były ideołah Minharvykankama. Mienavita Kliševič u 2016 hodzie na adkryćci pomnika Leninu ŭ Minsku biŭ i dapamahaŭ AMAPu zatrymlivać Źmitra Daškieviča.
20 žniŭnia 2020 hoda padčas pradziaržaŭnaha rovarnaha prabiehu deputat-kamunist pakazvaŭ na praśpiekcie fak aŭtamabilistam, jakija sihnalili i vykrykvali słovy asudžeńnia.
Kliševič viadomy svaimi adyjoznymi vykazvańniami. Tak, naprykład, u 2022 hodzie ŭ efiry jutub-kanała «SB TV», kamientujučy naradu ŭ Łukašenki, pryśviečanuju pracy Parku vysokich technałohijaŭ, prapanavaŭ vazić ajcišnikaŭ z rydloŭkami ŭ Chatyń: «Kab prasiaklisia duchoŭnaściu».
Svaju inicyjatyŭnuju hrupu zarehistravała i biełaruskaja lohkaatletka, jakaja vystupaje ŭ skačkach u daŭžyniu i trajnym skačku, Anastasija Mirončyk-Ivanova. Paznačana, što jana źjaŭlajecca siabram nacyjanalnaj kamandy Respubliki Biełaruś pa lohkaj atletycy.
Cikava, što taksama na deputactva pretenduje Anatol Chiščanka. U apublikavanych CVK źviestkach jon paznačany jak biespartyjny piensijanier. Ale viadoma, što ŭ 1999 hodzie byŭ abrany členam Vyšejšaj rady Libieralna-demakratyčnaj partyi, a ŭ 2006 hodzie pa ciapierašni čas pracavaŭ namieśnikam staršyni Libieralna-demakratyčnaj partyi. Ale ciapier jon pa niejkich pryčynach vyjšaŭ z partyi. Raniej Chiščana abiraŭsia deputatam abłasnoha savieta deputataŭ dvaccać šostaha sklikańnia.
Svaje inicyjatyŭnyja hrupy taksama zarehistravali dyrektarki škołaŭ, dyrektary kaledžaŭ, namieśnik hiendyrektara «Biełsajuzdruku», namieśnik načalnika «Minskaha adździaleńnia Biełaruskaj čyhunki», rektar Akademii kiravańnia pry prezidencie, zahadčyca ŭ dziciačym sadku, piedahahinia-psichałahinia z Kamunistyčnaj partyi Biełarusi, trenier, indyvidualny pradprymalnik, hałoŭnyja lekary minskich balnic dy inšyja.
Pry hetym byłoha kiraŭnika likvidavanaj partyi «Zialonyja» Dźmitryja Kučuka, jaki chacieŭ stać deputatam, nie zarehistravali.
«Skončyłasia maja vybarčaja kampanija. Na žal, nie ŭdałosia zarehistravać inicyjatyŭnuju hrupu. Farmalnaj padstavaj dla admovy pasłužyła pamyłka druku ŭ dakumientach. Chaču padziakavać tym ludziam, chto byŭ pobač sa mnoj u hety niaprosty čas. Dla mianie hetyja ludzi hieroi», — napisaŭ Dźmitryj u fejsbuku.
Byłoha kiraŭnika likvidavanaj partyi «Zialonyja» Dźmitryja Kučuka, jaki išoŭ u deputaty, navat nie zarehistravali
Cichanoŭskaja prapanuje bajkatavać vybary, a «Česnyja ludzi» — hałasavać suprać usich. Nie damovilisia?
«Usia terytoryja budzie pad videanazirańniem». U MUS raspaviali pra padrychtoŭku da vybaraŭ
Usio zdaryłasia na Novy hod. Śmierć samaj publičnaj supracoŭnicy minskaha AMAPa dahetul pakidaje pytańni14
Kamientary