Na pytańnie, ci jość jakija-niebudź naviny z Maskvy i ci viaducca takija pieramovy ŭvohule, pres-sakratar premjer-ministra Biełarusi Alaksandr Cimašenka zajaviŭ: «U mianie niama takoj infarmacyi».
Rasijskija aficyjnyja krynicy i ŚMI taksama ničoha nie paviedamlajuć ab pieramovach.
Napiaredadni Alaksandr Cimašenka paviedamiŭ žurnalistam, što čarhovy raund pieramoŭ ab pastaŭkach nafty pavinien prajści va ŭradzie Rasii 9 studzienia. «Pavodle zaprašeńnia namieśnika staršyni ŭrada Rasijskaj Fiederacyi Ihara Siečyna biełaruskaja delehacyja na čale ź pieršym namieśnikam premjer-ministra Uładzimiram Siamaškam nakiroŭvajecca ŭ Maskvu dla praciahu pieramoŭ ab umovach pastaŭki nafty z Rasijskaj Fiederacyi ŭ Respubliku Biełaruś», — skazaŭ pres-sakratar.
Jon padkreśliŭ, što biełaruskaja delehacyja maje ŭsie nieabchodnyja paŭnamoctvy dla padpisańnia adpaviednych dakumientaŭ.
«Pry hetym pazicyja biełaruskaha boku pa-raniejšamu hruntujecca na nieabchodnaści dasiahnieńnia ŭzajemaprymalnych damoŭlenaściaŭ u miežach dziejnaj pravavoj bazy biełaruska-rasijskich adnosin», — zajaviŭ Cimašenka.
Mižuradavaje biełaruska-rasijskaje pahadnieńnie ad 12 studzienia 2007 hoda, jakoje rehuluje ekspart nafty i naftapraduktaŭ, spyniła dziejańnie ŭ 2010 hodzie. Novaje pahadnieńnie płanavałasia padpisać u Maskvie 30—31 śniežnia 2009 hoda, adnak z-za supiarečnaściaŭ bakam heta zrabić nie ŭdałosia.
U vyniku Rasija abviaściła, što z 1 studzienia 2010 hoda ŭsia nafta, jakaja pastaŭlajecca ŭ Biełaruś, pavinna abkładacca standartnaj ekspartnaj pošlinaj (u 2009 hodzie u canu ŭvachodziła śpiecyjalnaja pošlina ŭ pamiery 35,6% standartnaj ekspartnaj).
Raniej Maskva zajaŭlała pra hatoŭnaść biaspošlinna pastavić u Biełaruś u 2010 hodzie dla ŭnutranaha spažyvańnia 5—6 młn. ton nafty, a astatni abjom abkładać 100-pracentnaj ekspartnaj pošlinaj. Adnak Minsk nastojvaje na biaspošlinnym uvozie ŭsioj nafty, jakaja pierapracoŭvajecca na biełaruskich NPZ, matyvujučy heta isnavańniem Mytnaha sajuza.
Papiaredni raund pieramoŭ adbyŭsia ŭ Maskvie 6—7 studzienia, adnak bakam nie ŭdałosia dasiahnuć damoŭlenaści.
Ciapier čytajuć
Kaledž chacieŭ zasudzić studenta i spahnać ź jaho 13 tysiač rubloŭ — ale junak daŭ adpor sistemie5
Kamientary