Siarhieja Čałaha i žurnalistaŭ Biełaruskaha rasśledavalnickaha centra abviaścili ŭ miždziaržaŭny vyšuk
Nieviadoma, pa jakim artykule zaviedzienaja adna ci niekalki spraŭ suprać žurnalistaŭ-rasśledavalnikaŭ.
Zasnavalnika i kiraŭnika Biełaruskaha rasśledavalnickaha centra Stanisłava Ivaškieviča i aŭtara videaprahram miedyjaprajekta Siarhieja Čałaha ŭnieśli ŭ bazu vyšuku rasijskaha MUS. Raniej paviedamlałasia pra znachodžańnie ŭ hetaj bazie traich byłych supracoŭnikaŭ BRC, a ciapier žurnalistaŭ «Biuro Miedyja», piša BAŽ.
«Siońnia možam kazać pra toje, što ŭ miždziaržaŭny vyšuk abvieščanyja piać byłych i dziejnych supracoŭnikaŭ Biełaruskaha rasśledavalnickaha centra, — raspavioŭ Biełaruskaj asacyjacyi žurnalistaŭ Stanisłaŭ Ivaškievič. — Pieršymi na heta źviarnuli ŭvahu členy kamandy «Biuro Miedyja», jakija pracavali ŭ BRC na momant pryznańnia jaho «ekstremisckaj arhanizacyjaj». Heta žurnalisty Alaksandr Jaraševič, Alaksiej Karpieka i Volha Alchimienka. Kali ž my pravieryli bazu rasijskaha MUS, to znajšli ŭ rosšuku jašče mianie i Siarhieja Čałaha».
U vieraśni 2022 hoda Biełaruski rasśledavalnicki centr byŭ pryznany rašeńniem Viarchoŭnaha suda Biełarusi «ekstremisckaj arhanizacyjaj».
Na dumku Stanisłava Ivaškieviča, uklučeńnie piaci dziejnych i byłych supracoŭnikaŭ BRC nie źviazanaje ź niejkaj kryminalnaj spravaj u Rasii. Miarkuje, što, vierahodna, heta prosta adlustravańnie sajuznaha vyšuku pa navodcy Biełarusi z nahody kryminalnych spraŭ, zaviedzienych u Biełarusi.
Nieviadoma i pa jakim artykule zaviedzienaja adna ci niekalki spraŭ suprać žurnalistaŭ-rasśledavalnikaŭ.
«Ale, uličvajučy, što ŭ Biełarusi siłaviki prychodzili na adrasy mianie i inšych ludziej, nie abaviazkova źviazanych z BRC siońnia, pryblizna ŭ adzin čas, to heta moža śviedčyć pra toje, što heta ŭsio praciah spravy, zaviedzienaj krychu raniej, — razvažaje Stanisłaŭ Ivaškievič. — Miarkuju, što ŭniasieńnie ŭ rasijskuju bazu — heta techničnaje nastupstva taho, što nas abvieścili ŭ vyšuk biełaruskija ŭłady. A čamu ŭłady źviartajuć na nas asablivuju ŭvahu? Siarod inšaha, na maju dumku, praz toje, što našyja publikacyi ŭ tym liku prynosili istotny ekanamičny ŭron karupcyjnym schiemam pad prykryćciom biełaruskich uładaŭ pa abychodzie zachodnich sankcyj suprać Biełarusi i Rasii».
«Heta prykra i aburalna, ale my byli hatovyja ŭžo daŭno da cisku. Adkazam na cisk z našaha boku jość aktyvizacyja našych vysiłkaŭ, što my i prademanstrujem ciaham bližejšych miesiacaŭ. Čakajecca vychad šerahu hučnych rasśledavańniaŭ», — padkreśliŭ žurnalist.
Biełaruski rasśledavalnicki centr
Stanisłaŭ Ivaškievič zasnavaŭ Biełaruski rasśledavalnicki centr u 2018 hodzie. Kamanda miedyjaprajekta vymušana źjechała ź Biełarusi ŭ 2021 hodzie paśla razhromu siłavikami studyi BRC u Minsku.
Stanisłaŭ Ivaškievič — nieadnarazovy pieramožca tvorčaha konkursu BAŽ «Volnaje słova», łaŭreat premii Global Anti Corruption Champions Award u 2023 hodzie.
Ekanamist, publicyst i žurnalist Siarhiej Čały viadzie pieradačy na YouTube-kanale Biełaruskaha rasśledavalnickaha centra z 2022 hoda. Tut jon aŭtar i viadoŭca prahram «Naviny z Čałym» i «Čały: ekanomika». Łaŭreat premii Global Belarus Solidarity Award 2020.
«Jamu pa načach śnilisia ludzi, jakich jon pasadziŭ». Stali viadomyja novyja detali apošnich dzion žyćcia syna Jarmošynaj7
Kamientary
Udivitielno čto zahołovok i tom, čto v rozysk objavlen Čałyj, chotia sam po siebie Čałyj absolutno biezvriedien dla riežima, jeho tak, za kompaniju objavili v rozysk.